Hei Hoa Mauroa, na Aperahama Hurihanganui

Photo Supplied

Waatea Team Hei Hoa Mauroa, na Aperahama Hurihanganui

Download Audio

Nā te ruri nei me tōna kaitito a Aperahama Hurihanganui Te Tohu Ruri Reo Māori tuatahi i toa, ki ngā Tohu Kaituhi a Pikihuia. Whakarongo mai, panui mai.

Hei Hoa Mauroa

ka takoto tīraha a Pāpā
ānō nei ko te tōnga o te rā
pō te ao i te katinga o ōna mata
kei te noho āmaimai te whānau
e karapoti ana ngā whakaahua
ka ora te ngira a te tohunga
ngiiiiiii ngi ngi ngi ngiiiiiii

mā te aha i te ngira Pākehā
hei whakairo i te whakapapa Māori
ka toitū ki te kiri
e whaihua ai te whakatauākī–
‘ ko tō ringa ki ngā rākau a te Pākehā’‘
ko tō ngākau ki ngā taonga a ō tīpuna’
ngiiiiiii ngi ngi ngi ngiiiiiii

ka riro tōna rae i te ngau a te ngira
ko mamae hei hoa maupoto, ko mataora hei hoa mauroa
tetē ōna niho me he kurī
whakamakiki ōna waewae me he rākau
rere ōna roimata me he awa … kāti.
‘ kei te pai koe?’ … ‘āe’ … ‘āna, hoake tonu tāua!’
ngiiiiiii ngi ngi ngi ngiiiiiii

ko ā taipakeke waiataata, ko ā taiohi kōhimuhimu
me ā taitamariki katakata
e haruru ana i te whare
nā konā i tau ai tōna wairua
ko te hiringa mahara i pōkaihia
kia mahea ai tōna pākinikini, kia au ai tāna moe
ngiiiiiii ngi ngi ngi ngiiiiiii

ka takatakahia e ia
te ara wairua ki tua whakarere
ki Rarohenga rānō
te orokohanga o te moko
ka pōhiri mai a Uetonga, a Mataora, a Niwareka
ka puta ki te whaiao, ki te ao mārama

ka ngū te ngira a te tohunga
ka matike mai a Pāpā
ānō nei ko te uranga mai o te rā
whiti ana te tīwhana i te rae me he hihi
ka āhuru te whare, ka kaikā te whānau
ko Rūaumoko e ngunguru nei
ko ōna mata ka oho, ko onamata ka ora

He tuhinga tēnei nō te Pukapuka Pakipoto 15 nā Huia, ā, nā te whakaae a te Whare Tā o Huia i tuku ai tēnei ruri ki a koutou. Tēnā hokona tē pukapuka nei ki te pae ipurangi a www.huia.co.nz. ($25, Te Whare Tā o Huia)

RELATED NEWS

Prime Minister arrives in Whakatane to speak with tribal leaders He koha mā ngā mōrehu o Loafers Lodge He ara hou mō ngā kaiwaihanga kiriata