Listen Now: 
Download AudioKua whakawhānui ake te titiro o Te Māngai Pāho me Irirangi Te Motu ki te whāngai pūtea ki ngā whare waihanga kiriata Māori, kia piki ake ngā mahi hanga hōtaka, hanga pakiwaituhi, me te hanga whakaari anō hoki mā ngā tamariki kia muia katoatia te ao.
E $50 miriona tāra te nui o te puna taunaki a ngā tari e rua nei, hei whāngai ki taua rāngai kiriata, ā, ko Te Puna Kairangi te ingoa. Ko te manako mōna kia rewa i ngā pakiwaitara me ngā mahi whakaari kia kitea e ngā iwi katoa o te ao ki runga i taumata pāpāho pēnei i a Netflix.
Hei tā te kaihautū o Te Māngai Pāho, hei tā Larry Parr, kei te harikoa nui ia i ngā mahi ka puta i ngā whare waihanga kiriata Māori ā ngā tau e heke mai nei. Hei tā Parr anō, “Ko te tūmanako, i te mutunga iho o te rā, ka wātea kia whakatuwhera i te huarahi ki ēnei nā kaupapa kounga, ki ngā kiriata taonga, me te nuinga o te pūtea ki a mātou kaiwaihanga kaupapa.”
