Taika Waititi Uri Aotearoa o te Tau

Taika Waititi Uri Aotearoa o te Tau

Hei whakatepe ake, kua whakawhiwhia a Taika Waititi ki te tohu Uri Aotearoa o te Tau. ara, Nzer of the Year. I tuu te po whakahirahira nei, ki te Langham Hotel i Tamaki inapo.

Te matenga a Te Makariini Temara

Kei te tangihia tetahi o nga pou arahi i a Ngai Tuhoe a Te Makariini Temara. I mate ia i roto i a Whakatane inanahi, e rima tekau ma waru ona tau. He maha nga kapa o Te Matatini kua tahuri ki te mihi ki a ia, ina koa ra, na Temara te kapa o Ruatahuna Kakahu Mauku i arahi ki Te Matatini, tekau tau ki muri. I Te Whare Wananga o Awanuiarangi a Te Mara e mahi ana. Hei taa te mangai torangapu o Te Waiariki, a Te Ururoa Flavell, he tohunga a Te Mara ki te reo me nga tikanga Maori, na kona ano i rite ai i a ia te korero ra, rakau tau matua, huihuinga manu.

Auahi kore te rohe o Rotorua

Kei te tautoko tetahi o nga kaimahi hauora o Rotorua i te whakaaro kia auahi kore te rohe. Katahi ano a Rotorua ka whakatuu rahui e auahi kore ai nga turanga pahi, whare pukapuka, papa takaro me nga papa rehia. Hei tera tau ka horapa te rahui nei ki nga ara hikoi ki waho i nga wharekai me nga maakete. Hei taa Mapihi Raharuhi o te roopu Healthy Families Rotorua, ko te whainga kia auahi kore te motu katoa, hei te tau rua mano rua tekau ma rima.

Te hui pakihi Taniwha Taraakona

Kua tutuki i te hui pakihi Taniwha Taraakona tana whainga kia tuu etahi whakaaetanga tauhokohoko kotahi rau miriona taara te uara, i waenganui i nga pakihi Maori me nga paihi i powhiritia kia haere mai i Ahia ki te hui. Hei taa Tavake Afeake o Ngati Kahungunu, i te otinga o te hui, kotahi rau, toru tekau ma waru miriona taara te uara o nga whakaaetanga tauhokohoko i tutuki.

Te waitohutanga mo Maori me Mana

Kei te taataa te kaiarahi i a Aotearoa Tuatahi a Winston Peters i te roopu Mana me te RTM mo te whakamahi i tetahi o nga kura hourua o Whangarei mo te waitohutanga o taa ratou kawenata mahi tahi i te timatanga o te wiki nei. I haere nga roopu e rua ki te kura hourua o Te Kapehu Whetu ki te waitohu i te kawenata, engari, hei taa Peters, na tera mahi, tera pea ka whakamahia te kura hei whutuporo torangapu hei nga wiki e tuu nei.

1.5 miriona ki te Whare Toi Hundertwasser

Kua whai te Whare Toi Hundertwasser i te kotahi ira kati rima miriona taara i te Kaunihera o te Raki, kia oti au, kia tuu ai. Kua whai taua whare toi i te iwa tekau oorau o te putea e wawatatia ana inaianei, a, ko te manako o ona kaimoemoeaa kia timata te whakatuunga mai o taua whare, hei te toru tekau o Pipiri.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

MacDonald takes helm at Ngatiwai Kaumatua on Iron Maori track Iwi leaders set sights on land management