Tautoko te kingi i nga iwi kua raru e nga take tiriti

Tautoko te kingi i nga iwi kua raru e nga take tiriti

Kua tahuri a Kingi Tuheitia ki te tautoko i nga iwi i raru nei a ratou whakataunga tiriti i a Aotearoa Tuatahi i tera wiki. Kua tuhi reta te Kingi ki a Te Atiawa, Taranaki, Ngaruahine, Rangitane ki Manawatu me Ngati Kahu ki Whangaroa, a, hei taana, ka awhina ia i era iwi ki te whakatutuki i waa ratou whakataunga, ahakoa kua whakakotitihia e Winston Peters me tona roopu.

Maori i roto i nga kowhiringa pooti-a-rohe

Ahakoa te tokoiti o nga Maori i pooti, i angitu tonu etahi o ngai tatou i roto i nga kowhiringa pooti-a-rohe i nga rangi whakataa nei. He Maori te kahika hou o Porirua, ara, ko Mike Tana. Ko Apiata Tapine, te Maori tuatahi kia noho ki te Kaunihera-a-rohe o Ahuriri, koia te Pou Whakahaere i te Pokapuu Ako i Maraenui, ma EIT. Ko Bayden Barber raua ko Henare O’Keefe nga Maori i pootihia ki te Kaunihera-a-rohe o Heretaunga. I whai waahi a Will Flavell raua ko Paula Bold-Wilson ki te Poari Hapori o te Uru o Tamaki. Ko Steve Chadwick ano te kahika o Rotorua, a, Tania Tapsell, Merepeka Raukawa Tait me Trevor Maxwell nga Maori kei te tepu korero. I pootihia a Willow-Jean Prime ki te Kaunihera o te Raki, engari ano a Dover Samuels, kaore i angituu. Huri atu ki Te Wairoa, i pooti nga kaipooti o reira, kia tuu he tuuru Maori motuhake ki to ratou Kaunihera hei te kowhiringa pooti e whai ake nei.

Putea mo te Tarahiti o Te Hiku o Te Ika

Kua whai putea te Tarahiti o Te Hiku o Te Ika ki te whakarauora i nga roto o te rohe. Toru rau, rua tekau mano taara kua hoatu ki a ratou i te Putea Te Mana o te Wai, he putea na te RTM i whakarite i roto i te tahua putea a te Kawanatanga i tenei tau. Ka whakapaua e te Tarahiti o te Hiku o te Ika, taa ratou i whai nei, ki nga roto moana o Wahakari me Rotoroa, tae atu ki nga whenua wai maakuukuu me nga rauwiringa taiao e karapoti ana i aua roto.

Manatu Taiohi Tamariki Whanau

Ahakoa kua whakatuuria he manatuu tamariki hou hei whakakapi i te Manatu Taiohi Tamariki Whanau, e mataku ana te roopu Whaia Te Iti Kahurangi ka hee tonu te mahi. Hei taa Paora Crawford Moyle o Whaia Te Iti Kahurangi, kei roto i te ingoa, ara Ministry for Vulnerable Children, te hee tuatahi. Hei taana, kaore tonu te Kawanatanga i te aro ki nga purongo e ata tohu ana i nga take nui e noho nei te tokomaha o nga tamariki Maori ki te raru, ki raro ranei i te maru tautiaki o nga tari Kawanatanga.

Hui a Todd McClay ki te Kahui Rangatira-a-Iwi

Kua hui te Minita i nga take Tauhokohoko a Todd McClay ki te Kahui Rangatira-a-Iwi ki te korero mo te rautaki tauhokohoko a te Kawanatanga. Kua taataahia te Kawanatanga e te Roopu Whakamana i te Tiriti i nga raa tata nei mo te aro kore ki te iwi Maori i roto i te whakaaetanga tauhokohoko TPP. Hei taa McClay e tika ana kia noho ki te korero ki te Kahui Rangatira-a-iwi, i te mea, tekau ki te toru tekau oorau o nga miiti me nga raumei miraka e haere ana ki taawaahi, na nga umanga Maori i whakarite, a, e wha tekau oorau o te rangai ngahere me te rangai rawa ika, kei roto i nga ringaringa o te Maori.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Iwi leaders to take action on climate change Veterans sticking with flag they served under Views sought on Maori literacy