Listen Now: 
September 24, 2013
Kaahore etahi roopu e pai ana ki te Maori.
Waatea Team
Posted On September 24, 2013
He kakii whero nga mema o te karapu Rotary i Oamaru.
Koia te whakapae a Fliss Butcher kaiwhakataetae kia tuu hai koromatua o Waitaki na te poto rawa o
te waa i whakaritea mona ki te korero i ana kaupapa me tana mihi reo Maori i tetahi hui i karangahia e Rotary.
Hai taana…i whakahaaweatia a ia mo tana hononga ki a Ngai Tahu he kanga tera ki a ia me tona iwi.
Ko taa Rotary whakautu, kotahi meeneti noa iho i whakaritea mo tena tangata, mo tena tangata koia taa ratou tikanga.
Kei te puawai nga pakihi Maori
He pai ake te tuu a nga pakihi Maori i te tau kua ngaro nei.
Koia te kitenga rangahau o te waa me te kii, tata ki te 30 oorau o aua pakihi ka whakapiki te rahi o a ratou kaimahi a te tau kei te haramai.
He aawangawanga no ratou ki te piki kino o te utu penehiini, te piki o te taumata itarere me te uaua ki te whakapaa atu ki te puutea tautoko.
Ki etahi kaiwetewete oohanga kei te kite i te rerenga keetanga o te haapori pakihi he tohu pai tera.
He whakatuupato ki nga kura
Tera pea ka kuhu atu te Kaawanatanga ki te whakahaere i nga kura ki te kore o ratou tauira e whai hua.
Hai taa Hekia Parata Minita Maatauranga e tika ana kia herea nga kaiako ki te anga pehea o nga aakonga.
Hai taa Parata, ko te hiahia kia aata whakahaere i nga kura kei reira nga tauira e tapepe ana.
70 nga kura kei te whakahaerehia e tetahi kaikoomihana a te tari maatauranga.
He aawha te korero
E matapae ana ka haramai he aawha ki te Ika a Maaui he nui nga whakatuupato kei te rongohia.
E meingatia ana ka kino nga tohu huarere mo nga raa e rua.
Kotahi rau toru tekau kiromita te rere o te hau ki etahi rohe ka kite pea i te horo o nga pari takutai aa ka waipuketia nga whenua paapaku.
Kaati hai te mutunga o te wiki ka paki ano te rangi.
He waahi tapu kei Waikanae.
E whakahaarangi ana tetahi roopu Karaitiana i Waikanae kua tirohia to ratou whenua hararei hai waahi tapu, tera pea ka whakatahahia e te roopu Pouhere Taonga.
Ma reira hai taa te roopu Karaitiana raa ka whakaheke te waariu o taua whenua.
Heoi ano e kii ana te iwi kaainga koia te waahi i pakanga ai a Te Atiawa ki a Ngati Raukawa me te whakapae kei reira tonu etahi o nga mate e takoto ana.
Hai taa te tari Pouhere Taonga e kore taua whenua e aukatingia engari, ka tohungia hai waahi motuhake puri mahara.
Nga Whakaritenga a Reipa
Kua piki ake nga Maori i te raarangi mahi o te roopu Reipa.
Kua hoatu ki a Shane Jones te tuuranga tuarima me nga take tupu oohanga, kua mau ki te koopaki take Maori aa kua riro i a ia nga kaupapa hanga whare me nga ahuatanga tapahi raakau o te ngahere.
Ka uru nama iwa a Nanaia Mahuta ki te tautoko i nga kaupapa TOW me nga take tupu e haangai ana ki te Maori.
Waihoki kua neke whakamua a Louisa Wall ki te whakahaere i nga take rangatahi, i nga kaupapa haapori, i nga mahi tuuao.
Ka mutu ko Moana Mackey tetahi atu o tatou ki te whai hua ko ia te maangai hou mo nga take taiao, mo te puutaiao, mo te hurihuri aahuarangi.
Copyright © 2013, UMA Broadcasting Ltd
RELATED NEWS
