April 26, 2024
Junior Tana | Ko te motuhaketanga o ngā pounamu e tohu ana ki te ao nō hea mātou
Nā ngā taonga motuhake o te taiao ki Te Waipounamu i toko ai te ingoa o te kapa haka hōu ko Te Kōkōtangiwai ki Waitaha.
Koia ngā whakamārama a te Pouwhakahaere o te kapa hōu nei a Junior Tana i mua mai i tō rātou eke ki te atāmira o ngā whakataetae ā-rohe mō te wā tuatahi i tēnei wiki.
E 13 ngā rōpū ka tū me te aha e rua o aua kapa he tauhōu ki ngā mahi tauwhāinga. Hei tā Tana, he mouri tō tō rātou ingoa hei whakamārama atu ki te ao ko wai rātou, nō hea rātou ano hoki.
“He momo pounamu tērā, hēoi anō, i ngā rā o mua ko Waitaha tērā i pā tata ana ki Ōtautahi nei ēngari nā te whakakorenga o te rohe o Te Waka ā Māui, kei roto i tō mātou rohe te 80% pea o Te Waipounamu. Hēoi anō, koia nei te wāhi anake o te motu, o te ao i taea ana te kimi pounamu, hēoi anō i whakaaro ake mātou koia nei pea tētahi tohu e mōhio ai te ao nō tēnei rohe mātou.”