Pakarū te pūnaha reiti whenua i Te Tai Tokerau

Pakarū te pūnaha reiti whenua i Te Tai Tokerau

He tohu, kei te pakarū te pūnaha reiti whenua i te Tai Tokerau. Koirā tā Season-Mary Downes, roia o Tukau Law, whai muri iho i te putanga mai o te kōrero e kī ana, tata ki te rua tekau miriona tāra te nama reiti e iri ana ki runga i ngā whenua Māori i te Tai Tokerau. Kua whakatūria e ngā Kaunihera o te rohe, he kōmiti hei āwhina i ngā kaipupuri whenua Māori ki te utu i taua nama, heoi, hei tā Season-Mary Downes, koinei te mate o te uta tāke ki runga i ngā whenua Māori i tērā rautau, me te kore i āta kōrero ki te hunga nō rātou nei aua whenua.

Puta he hua i te hui taumata mō te pūnaha ture

E kaha ana te tumanako o tētahi uri kēnge, ka puta he hua i te hui taumata mo te pūnaha ture o te motu i tenei wiki. Neke atu i te ono rau tāngata kua tae atu ki te hui taumata nei, e tū ana ki te Whare Tapere o Te Rauparaha i Porirua, ko ngā take nui e kōrerotia ana, me pēhea te whakaheke i te taupori mauhere, me pēhea hoki te aukati i te rere petapeta o te Māori ki ngā whare herehere. Hei tā te kaumātua o te roopu Mangu Kaha, a Denis O’Reilly, ahakoa kaore i whakaritea he wāhanga motuhake i te hui nei kia āta kōrerotia ngā kēnge, kaore e kore, he wā tōna ka whai waahi ngā kēnge ki ngā kōrero mō ēnei take nui e rua, i te mea, he hautoru o ngā mauhere, nō ngā kēnge.

Parea te haahi Katorika i Hato Petera

Me tūwhera tonu te kura o Hato Petera, engari, parea te haahi katorika ki te taha. Koirā te hiahia o te kaiārahi i te roopu, e noho whakatāuteute nei ki runga i te marae o taua kura i tēnei wā, arā, o Reti Boynton. Hei te rā nei, ka puta te whakatau i te minita i ngā take mātauranga, i a Chris Hipkins, he aha te anamata o te kura. Hei tā Boynton, nō Ngāti Paoa te whenua, mō te mātauranga Māori te kaupapa, nō reira, me hoki ki tērā āhuatanga.

Whakatārewa i te pūtea ki Te Ūpoko o Te Ika

Hei tā te Minita Whakawhanake Māori tuarua a Willie Jackson, me āta whai whakaaro Te Māngai Pāho, mena rā e tika ana tā rātou whakatārewa i te pūtea ki te reo irirangi o Te Ūpoko o Te Ika. Ka mū te reo o taua reo irirangi tautōhito a ngā wiki tata nei, ki te kore rātou e whai pūtea, otirā, ki te kore e tau ngā whiriwhiringa mō tā rātou raihana. Hei tā Jackson, ka āta kōrero ia ki te Minita, ki a Nanaia Mahuta mō tēnei take, i runga i te whakahau a Te Whakaruruhau o ngā reo irirangi Māori o te motu.

Hīkoi ki te Kaunihera-a-rohe o Tūranga

E whakarite ana ngā Māori o Tūranganui ā Kiwa ki te hīkoi ki te whare o te Kaunihera-ā-rohe o Tūranga, he kore nō rātou e rata ki tā te Kaunihera whakatau i tētahi take kaikiri. E ai ki ngā whakamārama, i puta tētahi kōrero i a kaikaunihera Meredith Akuhata Brown i roto i te niupepa e kī ana, i rongo ia i ētahi atu kaikaunihera e kī ana, tokoiti rawa ngā Māori i patua kia mate e ngā Pākeha tuatahi ki tēnei whenua. Mea rawa ake , ka kōhetengia a Akuhata Brown mō te takahi i ngā ture tiaki kōrero a te Kaunihera. Hei tā Akuhata-Brown, me whakapāha te kaunihera ki a ia, otirā ki te iwi.

Hōhā haere ana a Shane Jones ki a Ngāti Hine

E tukituki ana te Minita Whakawhanake Rohe a Shane Jones ki ētahi o ngā uri o Ngāti Hine. Hei tā Jones, kei te muhumuhu haere ia i te takaroa o te whakaotinga o te ara pahikara i te ara tereina o mua ki Ōtiria. ko tēnei ara pahikara nei, tētahi o āna kaupapa hei whakapoapoa i ngā tūruhi ki Te Tai Tokerau. Heoi, hei tāna, e hōhā haere ana ki ēnei uri o Ngāti Hine, e whakahōtaetae nei i te ahunga whakamua o te kaupapa.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

Haramai nei te ahua ō te inanga Hindu council first gathering set for this weekend He taumaha te noho te nuinga o ngā whanau i te Tai Tokerau