Kua whakanuia ngā kaituhi Māori i ngā Tohu Pikihuia

Waatea Team Kawata Teepa

Download Audio

Kua riro i te kaitito toikupu a Essa May Ranapiri nō Ngāti Raukawa te paraihe taioreore a Ngā Tohu Mātākōrero a Pikihuia, ko te Taonga Keri Hulme tērā.

I te pō tuku taonga i Te Whanganui a Tara i te Rāhoroi kua hori, i kī mai a Ranapiri kua roa te wā e whakaohooho ana ia i te mahi a Hulme, nāna te paraihe Booker i toa ki tana pakimaero The Bone People i te tau 1985.

He paraihe hou tēnei nā te whānau o te kaituhi rongonui a Keri Hulme, nō Kāi Tahu, ā, ko tana whāinga kia tautoko i tētehi kaituhi kua tāia pukapuka i ngā tau e rua kua pahure. E $5000 te nui o te paraihe, ā, i ahu mai te pūtea i te hoko kairapu o te tuhinga taketake o The Bone People i tērā tau.

I te pō tuku taonga, i kī mai te whānau o Hulme ko te whakatūnga o taua paraihe mā te hoko atu o te tuhinga taketake ko te ōhākī a Keri Hulme i mua i tana matenga i tērā atu tau.

Atu i tērā, e ono ngā tohu i tuku: He tohu rotarota reo Māori, reo Pākehā, he tohu pakipono reo Māori, reo Pākeha, me he tohu pakipoto reo Māori, reo Pākehā anō hoki.

E ai ki te māngai o te Whare Tā o Huia, a Kawata Teepa, “Ko Aperahama Hurihanganui tētehi i whai toa i te ruri i te reo Māori [Hei Hoa Mauroa te taitara]. Ko te ruri ki te reo Pākehā nā Shelley Burne-Field, mō Another Brown Face. Nā te kōrero pono i te reo Māori ko Zeb Tamihana Nicklin mō Tin Canning. Ko te reo Pākehā nā Nadine Anne Hura mō A Dangerous Country, nā te tuhinga poto i te reo Māori ko Jacob McGregor mō Te Koha Tūmatarau. Ko te reo Pākehā ko Anthony Pita mō Kintsugi with the colour pink.”

Kua tāia aua kōrero ki te pukapuka Ngā Pakiwaitara o Huia 15.  Kei konei te rārangi toa i te pae tukutuku a Te Waka Taki Kōrero | The Māori Literature Trust.

RELATED NEWS

He tupuna rongonui He raraunga nō Apanui, he taonga mā Apanui Kei te whakaāe te whānau ki te kaupapa here tāke: Te Anau Tuiono