June 20, 2023

Kei te whakaāe te whānau ki te kaupapa here tāke: Te Anau Tuiono

Reuben Epiha Posted On June 20, 2023

Ka pai hoki ngā whakahokinga kōrero ki ngā Kākāriki mō tō rātou kaupapa here tāke hou, koia te kōrero o tō rātou mema paremata a Te Anau Tuiono.

Hei tāna, kei te kite ngā whānau i ngā hua o roto.

“…i a au e kōrero ana ki tō tātou whānau, tautoko rātou ki tō mātou kaupapa here i te mea kua mohio rātou nā runga i tēnei, me matatika te punaha tāke, ka āhei ki te āwhina o tātou nei whānau e noho ana ki roto i te pohara”

Kei te tumeke rawa ngā Kākāriki i te putanga o te ripoata tau tāke me tāna e kī nei, tōnā toru rau ngā whānau whai rawa o te motu, a, he nui atu ā rātou pūtea i tēra o te toenga o te motu.

“…i puta tera ripoata i ahu mau i te tau tāke me te mea atu, ko tētahi rōpū whānau whai rawa, 311 noaiho o rātou, kei ā rātou te wāriu o te waru tekau ma rima piriona tāra, nui ake tera i te hunga 2.5 miriona tāngata ki Aotearoa nei.”

Ko tā ngā Kākāriki whai kia whakaiti ake i te piriti kei waenga i ngā hunga whairawa me ngā hunga pohara, me te tumanako mā te kaupapa here nei e tutuki ai taua whainga.

“He nui rawa te piriti kei waenga i te whai rawa me te poharatanga, ko tā mātou kaupapa here kia whakaiti i tērā kia āhei te katoa o ō tātou nei whānau kia rau atu te kai ki te tēpu, te utu i a ratou nei nama, kia noho ki tetahi whare mahana, kia whiwhi tūranga mahi e awhina atu ō rātou mauri.”

Tēnā whakarongo ki te uiui katoa ki konei.