Listen Now: 
Download AudioMei kore a Tama Huata ka ao ake ai te Wānanga Whare Tapere o Takitimu.
Koia te mihi a te heamana o Ngāti Kahungunu iwi a Bayden Barber, whai muri i te tū o te konohete huringa tau e 40 o te whare i te Taite kua hori.
I te tau 2015 riro ai a Huata, ā, hei tā Barber, i mua i tana whakarewatanga o Te Wāhanga Whare Tapere o Takitimu me tana rōpū kanikani a Kahurangi i te tau 1983, kāore he ara hei poipoi i ngā pūkenga toi whakaari o te iwi.
E ai ki a Barber, “Me mihi ka tika ki te tangata nāna nei tēnei kaupapa i whakaara ake, a Tama Huata. Kua tino waimārie mātou o Ngāti Kahungunu i ngā mahi kua whakaotia. Mō te hunga e hiakai ana i aua tau, i te takiwā o ngā waru tekau, kāore he kaupapa hei pupuri nei i ngā waiata me ngā kōrero a Ngāti Kahungunu i aua wā. Nō reira ko tēnei he kauwaka hei pupuri i ērā kōrero a Ngāti Kahungunu.”
Nā ngā kaikanikani taketake o te ao i rangatira ai te konohete huritau e 40 tau o Te Wānanga Whare Tapere o Takitimu me tana rōpū haka a Kahurangi i tū ki Ahuriri i tērā wiki. I reira ngā rōpū o Te Vananga ‘Are Tapere o Takitumu nō ngā Kuki Airani, me Red Thunder Next Generation, nō Kanata, ki te tautoko i te kaupapa, ā, hei tā Barber, he mea nui tēnā ki a ia, ka mutu, ki te kaupapa hoki.
“He tino ekenga tēnā. Ko te wiki kua hipa, he konohete, he hākari nui, ā, i tae mai ngā mea nō tāwāhi, ngā iwi taketake nō Amerika, nō Kanata, nō Tahiti, ā, me Rarotonga. Kua haere ki te whakanui i te wā.”
RELATED NEWS
