Porowhiu te tono kia panonitia he ingoa Māori i Waiheke

Porowhiu te tono kia panonitia he ingoa Māori i Waiheke

Kua porowhiu a Eugenie Sage, Minita i ngā Take Pārongo Whenua, i te tono kia panonitia he ingoa Māori i te moutere ō Waiheke ki te ipu para. I tono a Nobi-langelo Cera-malus o Waiheke ki ngā Pou Taunaha, kia panonitia te ingoa o Ōmiha ki Rocky Bay. Rua rau rua tekau mā whā mano tapaenga i whakahē i taua tono, tekau noa iho i tautoko. I te mutunga iho, i te Minita te whakatau whakamutunga, ā, hei tāna, ka pūmau tonu te ingoa Ōmiha, ka mutu, me whai tohutō te O.

Whai rawa a Waikato Tainui me Ngāi Tahu

Kua whai a Waikato Tainui me Ngāi Tahu i te toru rau, whitu tekau miriona tāra i raro i wā rāua whakaritenga tono raupatu. Kua whai rāua i tēnei pūtea tāpiri, nā te mea, ko rāua ngā iwi tuatahi ki te whakatau i wā rāua tono raupatu i te ngahuru tau iwa tekau. I taua wā rā, i te whakatumatuma ngā iwi ki te kōnae tahi piriona a te Kāwanatanga o Nahinara, nā reira, hei whakamāuru i ngā iwi, ka oati te peremia o taua wā a Jim Bolger, inā eke te uara o ngā whakataunga tono raupatu katoa ki tua atu i te kotahi piriona, ka whai a Waikato Tainui me Ngāi Tahu i te pūtea tāpiri nei. Nō reira, kotahi rau, iwa tekau miriona tāra kua haere ki a Waikato Tainui, kotahi rau, waru tekau miriona tāra kua haere ki ngā pūkoro o Ngāi Tahu.

Taupānga hou hei ako i te hītori mō Takaparawhau

Kua whakarewahia he taupānga hou e ako ai ngā manuhiri ki Takaparawhau i te hītori mo taua wāhi. Kei roto i te taupānga nei, arā, te Ngāti Whātua Ōrākei Auckland Virtual tours app, ngā kōrero mo te hītori, te taiao, me ngā wāhi tapu. Hei tā Jamie Cook o te Ringa Pakihi o Ngāti Whātua, rima rau mano tāngata ka toro i a Takaparawhau ia tau, nō reira, mokori anō kia mōhio rātou ki ngā kōrero a te Māori mo taua wāhi. Kei roto te taupānga nei i te reo Māori, Pākeha, Hainamana hoki.

Mataara ake ki ngā āhuatanga o te wai

Kotahi rau rangatahi ka pūtere i te wai hukahuka o te awa o Mōhaka River hei tēnei wiki, ko te kaupapa, kia mataara ake ai rātou ki ngā āhuatanga o te wai. E rima rā te roa o tēnei hōtaka mā ngā rangatahi nei, ko te Tarahiti o Te Taitimu, Te Tarahiti Whakawhanake o Ngāti Pāhauwera me Haumaru Wai Aotearoa kei te whakahāere. Hei tā Jonty Mills, tāhūhū rangapū o Haumaru Wai Aotearoa, tokomaha rawa ngā Māori ka toromi, nō reira, e tika ana kia ako tātou i ngā kōrero mo te mana o te wai.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

The mana of Ngapuhi is on the line Maori miss out on Internet promise Heat on for Miranda to be Pukorokoro