September 21, 2017
Peters kāore he hua o ngā whakataunga Tiriti o Waitangi
Peters kāore he hua o ngā whakataunga Tiriti o Waitangi
Kāore te kaiarahi i a Aotearoa Tuatahi a Winston Peters i te tino whakapono, ma te whakatau i ngā tono raupatu i raro i te Tiriti o Waitangi, ka puta he hua-ā-ōhanga, a-pāpori hoki ki te iwi Māori. Hei tāna, kāore ngā hua o ngā whakataunga tiriti i te turuturu iho ki ngā uri Māori o ia ra.
Tohu neehi rangatahi 2017
Kua whakawhiwhia te tohu neehi rangatahi o te tau ki a Jess Tiplady o te Greenstone Family Clinic, i Tāmaki Makaurau. Koia te neehi Māori rangatahi rawa kia whai i tana tohu neehi. I whakawhiwhia te tohu nei ki a ia i te hui-a-tau a ngā neehi o te motu e tū ana ki Te Whanganui-ā-Tara i te wiki nei. Hei tā Kerri Nuku o te Uepū Neehi Māori o te motu, ko Tiplady tētahi o ngā kaiarahi o apopo i roto i o tātou hāpori. I whai tohu hoki a Nuku i te wiki nei, arā, te tohu hōnore.
Rongowhakaata ki Te Papa
Hei te rā nei ka riro te mana o te taumata kōrero o Te Papa i te iwi o Rongowhakaata. Ka whakapuarehia hoki te whakaaturanga e pā ana ki a Rongowhakaata, arā, Ko Rongowhakaata: The Story of Light and Shadow. Kotahi rau, rima tekau ngā taonga a te iwi ka whakaaturia mai, arā, ko te pukapuka karakia a Te Kooti, he tokotoko wheua paraoa i whakairotia ai e Raharuhi Rukupo me te hoe i kohaina atu ai e Rongowhakaata ki a James Cook i te tau kotahi mano, whitu rau, whitu tekau mā iwa.
Te Kawanatanga hou mo te iwi Māori
Ahakoa kō wai te Kāwanatanga hou, me āta whai whakaaro rātou, he aha ngā taupātanga e tauārai ana i ngā wawata whare o te iwi Māori. Koirā te whakahau a te roopu Te Matapihi, he roopu e tautoko ana i ngā wawata whare o te iwi Māori. Hei tā to rātou māngai, a Rau Hoskins, kua tae ki te wā e hou ai ngā whakaaro kia whai whare mahana ai, kia whare haumaru ai ngā Māori, otirā, kia taea ai hoki e tātou he whare te hoko.
Esera kaua e pooti ki a Reipa
E pai ana kia whakaputa kōrero ngā kaitono o te RTM, ki tēna take, ki tēna take e ngākau nui ana rātou. Koirā tā te kaiārahi i te RTM, tā Mārama Fox, whai muri iho i te kī a Tuilagi Esera, kaitono i te tūru o te rāwhiti o Manukau, me kaua e pooti ki a Reipa, i te mea, kei te tautoko rātou i ngā mārena takatāpui, me te aha, he takahi tēra i ngā mātāpono karaitiana o ngā iwi poronīhia. Hei tā Fox, no Esera anō ōna whakaaro, ehara ēra whakaaro ōna i te taurite ki ngā whakaaro o rāua ko Te Ururoa Flavell.
Ardern kia patu i te mate hinengaro
E ai ki te kaiarahi i a Reipa, a Jacinda Ardern, ko tētahi o ngā take nui o tēnei kōwhiringa pooti, ko te mate hinengaro e horapa hāere nei ki waenganui i a tātou. Hei tāna i roto i āna tūtakihanga ki ngā hāpori Māori, kua rite tonu te karanga kia whai whare te iwi Māori, kia piki te kounga o ngā rātonga hauora ki a tātou, otirā, kia kitea hoki he mahi mā tātou. Ēngari, ko tētahi atu take kua rite tonu nei te rangona, ko te hiahia o te iwi Māori kia āwhinatia tātou ki te patu i te mate hinengaro, otirā, ki te tiaki i ngā tūroro mate hinengaro Māori.
Copyright © 2017, UMA Broadcasting Ltd: www.waateanews.com