Ko Te Whakataunga tono tiriti o Te Whakatōhea

Ko Te Whakataunga tono tiriti o Te Whakatōhea

He rā hou kua mahuta ake ki runga i te iwi o Te Whakatōhea, i te tāmokotanga o tō rātou whakataunga tono Tiriti O Waitangi. Kua hipa atu i te 20 tau tēnei iwi o Te Moananui-ā-Toi e whakamomori ana kia mokoia tā rātou tono Tiriti O Waitangi.

Nga Kerēme Whenua a Ngāti Paoa

He mōrikarika nui nō te iwi o Ngāti Whātua-o-Ōrākei i te horo rawa a te Minita Take Tiriti a Chris Finlayson, i te whakamanatanga ōna i ngā kerēme whenua a Ngāti Paoa ki te auahi nui o Tāmaki. Hai tā Renata Blair, māngai kōrero o Ngāti Whātua-o-Ōrākei, e rikarika katoa ana a Chris Finlayson i roto i tāna whai, kia whakatauria katoahia te huhua o ngā tono, i mua tonu i te rā kōwhiringa pooti. E ai ki a Ngāti Whātua-o-Ōrākei, kua tino tahuri te tukanga whakataunga tono Tiriti hai kaupapa pooti noa iho.

Ngā Paerewa Mātauranga

E ātete ana te Rūnanga o Ngā Kura Kaupapa Māori o Aotearoa ki ngā paerewa Mātauranga, he mea tāmi i ngā taitamariki e ako ana i raro i ngā mātāpono o te Aho Matua. Kua tekau tau ngā paerewa mātauranga e whakahaere ana ki roto i ngā kura o Aotearoa. Hai tā Cathy Dewes o te Rūnanga o Ngā Kura Kaupapa Māori o Aotearoa, he momo pēhitanga anō tēnei i te ahurea o te tamaiti Māori.

Karahipi mati hiko

Kua horaina ngā karahipi whakawhanake i ngā mahi mati hiko, hanga whārangi ipurangi anō hoki. Ko Pourama Kupenga o Ngati Porou tetahi o te 42 ākonga Māori, i whakawhiwhia ki tētahi o ngā karahipi nei, hai tāna he ara angitū tēnei mōna me tōna whānau.

Colin Meads

Ka whakamauharatia tonutia e te ao Māori te rākau tāeke o te ao whutupāoro a Tā Colin Meads kua tiraha, kua okioki. Ka hoki ngā mahara a Tame Te Rangi o Ngāti Whātua ki Kaipara ki te wā i tautokona e Ta Colin Meads, tētahi pō kohi pūtea a te karapu whutupāoro o Mangakāhia i ngā tau ki muri.

Te tūru o Waikato-Hauraki

Mā te ngakingaki ā mua ka tōtō ā muri, koinei te whakahau a Nanaia Mahuta mema Māori i te tūru o Hauraki, Waikato. Hai tā Nanaia mā te whakatakoto tika i te tūāpapa o te rōpū Reipa e pai ai ngā mahi ā muri nei.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Te Arawa saxophonist silenced as Minarapa Mitai-Ngātai mourned Maori land Bill delayed VIDEO PICK: Ihi – Jah Guide Me