Kua haina whakaaetanga a Ngati Tamaoho

Kua haina whakaaetanga a Ngati Tamaoho

Kua waitohu he whakaaetanga e tau ai te tono raupatu a Ngati Tamaoho, he iwi no Waikato / Tamaki Makaurau. I tuu te waitohutanga nei i te marae o Mangatangi i nga rangi whakataa nei. Tekau ira kati toru miriona taara te rahi o te putea ka haere ki a Ngati Tamaoho, tae atu ki te whare pirihimana o mua o Otara, he whenua i Manukau e pai ana mo te whakatuu whare, me te whenua e tuu mai ra nga kura o Te Hihi me Hunua, engari, ka riihi ano taua whenua ki te Karauna.

Kia tuupato Maanu Paul

I hui te Kaunihera Maori i Te Whanganui-a-Tara i nga rangi whakataa nei, a, i puta te karanga ki a Maanu Paul, toihau takirua o mua o te Kaunihera, kia mutu taana tohe-a-ture ki a Taa Taihakurei Durie kia tau ai te puehu. I te hui a Dick Dargaville.

Ngaa huarahi o Kaapiti Expressway

Heoi, kei te tautoko te roopu Kakariki i te whakaaro, kia whai ingoa Maori nga huarahi o mua o te Kaapiti Expressway i te raki o Te Whanganui-a-Tara. E whitu nga huarahi ka whai ingoa Maori, ara, ko te huarahi o Matene Te Whiwhi, Kaatuu, Una-iki, Kaakaakura, Rauoterangi, Hurumutu me te Hokowhitu. Tokomaha o te hapori e whakahee ana, ara, kaore e taea te whakahua, te mea, te mea, te mea, heoi, hei taa Jack McDonald o Nga Kakariki, he mea pai, kokirihia!

Kia ako ngaa hiitori o te takiwa

E punganangana ana ngaa kaiako me ngaa tumuaki o ngaa kura o te takiwa o Waitara ki te whakaaako i te hiitori o Te Atiawa, otira, o te Maori ki nga tamariki. Ko te Waitara Historical Trail Campaign te ingoa o te kaupapa nei, ko Damon Ritai, te tumuaki ko te kura o Kahikatea.

He haerenga motuhake ki Taiwan

E ai ki nga korero, kei te haere a King Tuheitia ki Taiwan i tenei marama, a, hei taa Tuariki Delamere, mangai torangapu o mua, na wai tana haere ka rongonui, katahi ka rongonui ke atu i te kupu taawai i puta i tetahi o nga mangai o te Kawanatanga o Taiwan, i kii ake ra ia, he Kiingi koretake, a, kaore te nuinga o nga Maori i te tautoko i a ia. I Taiwan a Delamere ki te awhina i etahi kaipakihi o Taiwan e hiahia ana ki te mahi tahi me Waikato Tainui, katahi ia ka rongo i nga korero mo nga kupu whakaiti nei. E ai ki nga korero, i puta aua kupu hanihani mo to tatou Kingi i tetahi haakari okawa, a, i reira a Rangi Whakaruru, mangai mo te Kingi.

Ka anga whakamua a Patu Taatahi

Ka tuwhera ano nga tatau o te kura tuatahi o Patu Taatahi me te kura tuarua o Patu Taatahi i te ra nei, whai muri iho i te waipuke i karawhiu i te takiwaa i nga wiki nei. Ka tae atu etahi mangai no nga ratonga whawhati tata ki nga kura i te ra nei ki te korero ki nga tamariki mo te waipuke. E rima rau tamariki ka haere ki nga kura e rua o Patu Taatahi.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Climate plan – cut cars, cut cows, grow trees New rules for whitebait protection Busting out poi for app launch