He tirohanga hou taa te tarahiti o Te Putea Whakatupu

He tirohanga hou taa te tarahiti o Te Putea Whakatupu

E hiahia ana te Tarahiti – He Putea Whakatupu, ki te mahi tahi ki nga Ratonga Whanau Ora ki te whakatairanga i nga kaupapa ako ki te panui, ako ki te pangarau. Ko He Putea Whakatupu te tarahiti e whakahaere ana i te putea e ahu mai ana i nga rawa hao ika Maori ki nga Maori noho taone, a, hei taa Willie Te Aho, heamana hou o te tarahiti, ma te mahi tahi ki a Whanau Ora ka mohio ratou o He Putea Whakatupu, ki hea ratou whakapau ai i taa ratou putea.

Jack McDonald mangai rangatahi ki roto o paaremata

E rikarika ana a Jack McDonald, kaitono o te Roopu Kakariki i te turu o te Tai Hauauru ki te whakatairanga i nga kaupapa Maori me nga kaupapa rangatahi ki roto i te ao torangapu. E rua tekau ma toru tau noa iho a Mc Donald, a, kei te turanga tuaiwa ia i te rarangi ingoa a nga Kakariki. He Maori te hautoru o te rarangi ingoa a Nga Kakariki.

Me piri te whanau ki te tupapaku

Me pehea te whakamama ake i nga taumahatanga ka paa ki te whanau pani? Koira te patai e matapakihia ana e Koomiti Whiriwhiri Maaori o te Whare Paaremata i tenei wa. Ko Keelan Reinsfeild o Ngati Raukawa tetahi kua whakapuaki korero ki te komiti, a, hei taana, he mea nui kia piri te whanau ki te tupapaku, mai i te matenga ki te nehunga, engari, i etahi wa, ka raru te whanau i nga ture me nga tikanga hei whai ma nga Pirihimana me nga kaitirotiro tupapaku. Nei raa nga whakaaro o Ahorangi Pou Teemara, matanga tikanga Maori o Te Whare Wananga o Waikato.

Te puumanawa Papapa

Na te kitenga atu, kaore he taupaanga Maori ma nga tamariki reo Maori kei raro iho i te rima tau te pakeke, i puta mai ai te taupaanga hou a te roopu Papapa i te wiki nei. Koira taa James Porter, kaihanga i te taupaanga hou nei. Hei taana, ko te nuinga o nga taupaanga reo Maori e hangai ke ana ki nga taiohi. Nei ra a Veronica Taawhai o te roopu Papapa

He mema poari hou o te poari maumaharangatanga i te 28

Tokowha nga taangata hou kua whakauungia ki te poari e kiia nei ko te Ngarimu VC & 28th Maori Battalion Memorial Scholarship Fund Board, ara, ko te Ahorangi maataamuri no Te Whare Wananga o Awanuiarangi a Te Tuhi Robust, koia te mangai mo kamupene A. Ko taakuta Melanie Riwai-Couch no Te Kura Kaupapa o Te Whanau Tahi te mangai mo kamupene D. Ko Ahorangi Linda Te Aho no Te Whare Wananga o Waikato te mangai mo nga kaiwhiwhi karahipi o mua, a, ko Philip Heeny no Te Kura Kaupapa Maori o Te Waiu o Ngati Porou, te mangai mo te whanau Ngarimu. Hei taa te Minita i nga take Matauranga, a Hekia Parata, he mea nui nga karahipi Ngarimu hei whakawhanake i nga rangatira o te ao Maori o apopo.

He rangahau maori hou taa Tahu Kukutai o te whare wananga o Waikato

Ki te pakari te whanaungatanga, ka ora te Maori. Koira te kitenga nui o te rangahau a Ahorangi Tahu Kukutai no te Whare Wananga o Waikato. Hei taana, ko te nuinga o nga whanau i uiuitia e ia mo taana rangahau, e whakaatu mai ana i nga tohu orite me nga korero orite mo te take e ora nei ratou, a, ko te pakari o te whanaungatanga i waenganui i a ratou, tetahi tohu korero i rite tonu nei te korerotia e ratou ki a Kukutai.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Media Release: Lizzie Marvelly appointed as Director, Rotorua Museum Te Whare Taonga o Te Arawa Maori land Bill delayed Heat on for Miranda to be Pukorokoro