Runanga Minita Hou o te Kawanatanga

Runanga Minita Hou o te Kawanatanga

Ka hui te Runanga Minita hou o te Kawanatanga i te ra nei. Na te peremia hou, ara, na Bill English tona Runanga Minita hou i panui mai inanahi. Kua hoatu nga konae Minita i nga take Pirihimana, take Wahine me nga take Taapoi ki a Paula Bennett, peremia tuarua. Ka mau tonu a Te Ururoa Flavell raua ko Hekia Parata, ki nga turanga Minita Whakawhanake Maori, Minita i nga take Matauranga. Hei te ra nei, ka whakawahia e te Kawana Tianara nga Minita hou e wha, ara, ko Alfred Ngaro, Jacqui Dean, Dave Bennett me Mark Mitchell

Te katitanga o Te Kura Kaupapa Maori o Rangiawhia

Kei te katia Te Kura Kaupapa Maori o Rangiawhia i te hiku o te Ika hei te mutunga o tenei wiki. I te whakahaerehia te kura e tetahi komihana i nga wiki nei, ara, e Tunney McFadyen. No te marama o Hongongoi i rihaina ai te tumuaki me nga kaiako e rua, whai muri iho i te pootihanga o tetahi poari hou mo te kura. Hei taa te kaiarahi i a Mana, a Hone Harawira, kei te tino pouri nga whanau o te kura i tona katinga.

Whakatuwherahia a Te Puea Marae ki te hunga kainga kore

Hei taa te Heamana o te marae o Te Puea, a Huri Dennis, ka whakatuwherahia ano nga kuaha o te marae ki te hunga kainga kore a tera tau, engari, ka rereke etahi o a ratou tikanga whakahaere i te kaupapa Manaaaki Taangata. Hei taana, e tika ana kia kaha ake te tautoko a te Kawanatanga i taa ratou kaupapa.

Hoki atu nga pakihi kohi koura o Kaikoura

E whakaae ana te Manatu Ahumahi kia hoki ano nga pakihi kohi koura o Kaikoura ki te moana i te ra nei, ki te mahi i taa ratou mahi. Mai ra ano i te ru whenua nui ki tera takiwa kua puritia nga pakihi kohi koura ki uta. Heoi, katahi ano te whakapae ka puta i te roopu GEONET, e kii ana, kia mau tatou, i te mea, he ruu whenua, tata ki te whitu hei taa te ine ru whenua, e haere tonu mai ana ki a tatou.

Tamaki Herenga Waka 2017

Ka maumaharatia etahi o nga manu tioriori me nga manu honenga o te ao Maori i te Ahurei Tamaki Herenga Waka a tera tau. Ka tu te ahurei nei ki te Wahapu o Tamaki hei nga rangi okioki o te huritau o Tamaki a tera tau, a, ka whakamaanawatia te hunga pera i a Ngapo ‘Bub’ Wehi, Prince Tui Teka, Dalvanius Prime me Taa Howard Morrison. Ko etahi o nga kaiwaiata o te ao tuuroa nei ka tae atu ki te whakanui i aua korokoro tuuii o mua, ko te kapa haka o Te Waka Huia, te Patea Maori Club, Whirimako Black, Ria Hall me Ranea Aperahama. Ko Leon Wharekura te kaiwhakahaere.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Ngati Hako fights tip expansion AFFCO targets Rangiuru unionists Views sought on Maori literacy