Hui mo te tono raupatu a Ngapuhi

Hui mo te tono raupatu a Ngapuhi

Kua hui te Minita i nga take Tiriti a Christopher Finlayson ki Te Kotahitanga o Nga Hapu o Ngapuhi me Tuhoronuku, ki te kokiri ano i te tono raupatu a Ngapuhi. E ai ki nga korero, kua panoni te peremia hou a Bill English raua ko te Minita i nga take Putea hou a Steven Joyce i etahi ahuatanga kia rata ano ai Te Kotahitanga me Tuhoronuku ki te mahi tahi. Hei taa te upoko o Tuhoronuku a Hone Sadler, i pai te hui ki a Finlayson, a, e whakapono ana ia ka kitea he ara whakamua hei te tau hou e tu mai nei.

Te Roopu Whakataunga Tiriti o Tuwharetoa

Kua patua e te Roopu Whakataunga Tiriti o Tuwharetoa, nga nama i te iri ki runga i tona upoko. Hei taa te Toihau o te Roopu nei, a Rakeipo Taiaroa, i patu ratou i waa ratou nama katoa i tenei tau, a, kua whakawhanakehia te uara o aa ratou rawa ki te toru tekau miriona taara. Na te hee o nga whakangaotanga putea a nga mangai o mua o te Roopu, i tata pakaru ai te pukoro o te iwi, engari, kua ara ake ano i roto i ana kaupapa mahi tahi ki etahi atu roopu o Ngati Tuwharetoa.

Te rarangi Minita hou o te Kawanatanga

Kua tuukarikarihia e te peremia hou, e Bill English nga konae Minita i roto i te Kawanatanga. Kua hoatu nga konae Minita i nga Take Taapoi, Take Waahine, Take Pirihimana hoki ki te peremia tuarua ki a Paula Bennett. Kua hoatu te konae Minita i nga take Matauranga ki a Nikki Kaye. Ko Judith Collins tetahi o nga Minita o mua, kua taaheke iho i te rarangi Minita hou o te Kawanatanga.

Te ingoa mo te Manatu hou Ministry for Vulnerable Children

Kaore te Kawanatanga i te maharahara ki nga whakahee a era atu roopu torangapu me nga roopu tamariki e hangai puu ana ki te Manatu hou kei te whakatuuria e ratou. Kei te pumau te Kawanatanga ki te ingoa Manatu Tamariki Whakaraerae hei ingoa mo te Manatu, ara, Ministry for Vulnerable Children, engari, kua utaina hoki he ingoa Maori ki te Manatu, ara, ko Oranga Tamariki.

Te whakatau a Louisa Wall

He takahi i nga tika o te tangata. Koira taa Louisa Wall o Reipa, whai muri iho i te whakauunga mai o tetahi whakaritenga hou i te Kawanatanga ki nga Ratonga Paapori kia whaaki ratou i nga taipitopito tumataiti mo a ratou kiritaki, penei i te ra whanau, te waahi noho, ara, me whaaki era momo taipitopito ki te Manatu Whakahiato Ora. Hei taa Wall, he momo maatai mata hunahuna tenei na te Kawanatanga i te tangata.

Nga koiwi i kitea i Mangonui

Kua nehua ano nga koiwi i kitea ra i Motukahakaha i Mangonui i nga rangi whakataa nei. Na kaumatua Dave Henare te nehu i whakahaere, a, hei taa te matanga whai para nei, a James Robinson, te ahua nei, e hia rau tau te tawhito o aua koiwi, no tetahi wahine. I nehua nga koiwi ki te urupaa o Te Patau i te rohe o Waimahana.

Te whakataunga a Te Akitai Waiohua

Kua waitohu a Te Akitai Waiohua i taa ratou whakataunga e iwa miriona taara te uara. Hei taa te Minita i nga Take Tiriti a Christopher Finlayson, ko te mahi inaianei, he whakatinana i nga whakaritenga o te whakataunga kia mana ai i roto i te whare paaremata. Kei roto hoki i te whakataunga te ahei ki te hoko i te tekau heketea whenua i Manukau me te mahi tahi ki te Karauna i roto i aana kaupapa whakatuu whare. Kaore nga tono mo nga whanga o Waitemata me Manukau i tenei whakataunga.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Education innovation rewarded Maori miss out on Internet promise Heat on for Miranda to be Pukorokoro