Listen Now: 
Moe mai ra Mita Mohi
Kei te tangi hotuhotu ano nga uri o Te Arawa ki tetahi o o ratou uru tapu nui kua hinga. Ko Mita Mohi o Ngati Rangiwewehi te tuatoru o nga kaumaatua rangatira o te iwi kia mate i nga wiki e rua noa nei, whai muri iho i te hurumututanga o Napi Waaka raua ko Fred Whata ki tua o pae huakau. Neke atu i te rua tekau mano tauira i whakangungua e Mita Mohi ki te mau taiaha i runga i te moutere o Mokoia, a, koia te kaumatua o te Manatu Pirihimana i nga wa o mua. I takaro ia ma te kapa Kiwi i te tau whitu tekau ma rua, he toki tenehi hoki. I whakawhiwhia ia ki te tohu MBE i te tau iwa tekau ma wha. Kei te marae o Tarimano i Rotorua ia e tangihia ana, hei te ata o te ra pare ka nehua.
Maori whai rawa ki Tamaki
Kei te whanake haere tonu nga Maori whai rawa i roto i te rohe o Tamaki. Koira tetahi o nga kitenga nui i roto i te purongo a te Uepu Tohutohu Maori o Tamaki. E ai ki te purongo nei, ko te utu taurite ki tena whare whanau Maori, ki tena whare whanau Maori ki roto o Tamaki, ko te waru tekau mano taara, a, e waru tekau oorau o nga whanau Maori kei Tamaki e noho ana, e kii ana, e pai ana taa ratou noho ki tenei ao. Hei taa te mangai torangapu mo Tamaki Makarau a Peeni Henare, ko tetahi o nga maharahra, kei whakarere enei whanau i to ratou ahurea Maori, na te mea, e aro nui ke ana ki te whai i te putea.
Whakapuarehia nga huarahi mai i te ru whenua
Hei te ra nei ka mohio nga kaimahi o Te Ohu Kaimoana, mena e pai ana kia hoki ratou ki to ratou whare ki roto i Te Whanganui-a-Tara. Kei te arotakehia ano te whare o to ratou tari i te huarahi o Thorndon i te ata nei, a, hei taa to ratou tahuhu rangapu a Dion Tuuta, i tenei wa, kei te kainga ana kaimahi e mahi ana. Ki etahi atu taipitopito korero mo te ru whenua, kua whakapuarehia ano te taunga waka rererangi o Kaikoura, e ai ki a Whale Watch Kaikoura, e ono nga tohora i kitea e ratou inanahi tae atu ki nga aihe, nga kekeno me etahi manu moana, he tohu enei kei te ora tonu te taiao o te moana.
Whare hou ki te uru o Tamaki
Kua waitohu whakaaetanga a Ngati Whatua o Kaipara, te Kawanatanga me te Hobsonville Land Company e tuu ai etahi whare hou ki te uru o Tamaki. Hei te raumati timata ai tenei mahi whakatuu whare.
Hui o te Tari Tamaiti Taiohi Whanau
Kua hui nga Whanau i whai wheako kino i raro i te Tari Tamaiti Taiohi Whanau, ki te matapaki, me pehea ra e pai ake ai te mahi a nga tari Kawnatanga. He mea whakatuu te roopu Te Rito: Restoration of Whanau, na runga ano i te tini o nga amuamu a nga whanau Maori mo nga kaupapa a te Tari Tamaiti Taiohi Whanau me taa ratou kaikiri mai ki nga whanau Maori. Hei taa nga whanau i hui i nga rangi tata nei, ahakoa kua whakatuuria he manatu hou, ara, ko Oranga Tamariki – Te Manatu Tamariki Whakaraerae, hei taa Dave Hati, upoko o Te Rito, ehara i te mea, ma te whakatuu Manatu hou, ka ea nga raru me nga maharahara.
Hui nga Maori noho taone
Kua hui nga roopu Maori Noho Taone ki te whiriwhiri me aha e ratou Te Putea Whakatupu, ara, te tarahiti e whakahonohono ana i nga Maori noho taone ki nga rawa ika a nga iwi. I haere nga roopu Maori Noho Taone, pera i a NUMA me Waipareira ki te kooti teitei i te tau nei ki te pakanga mo to ratou wahanga ki taua tarahiti. Hei taa te tahuhu rangapu o NUMA a Lance Norman, i tautoko te kooti i taa ratou kaupapa, inaianei, kua tahuri ratou ki te whakapakari i te whanaungatanga ki Te Ohu Kaimoana kia tika ai taa ratou whakamahi i Te Putea Whakatupu hei painga mo nga uri Maori e noho taone ana.
Whakauungia he tangata hou ki te Roopu Whakamana i te Tiriti
Kua whakauungia etahi o nga ihumanea whare wananga a Linda Tuhiwai Smith raua ko Tom Roa ki te Roopu Whakamana i te Tiriti mo nga tau e toru e tu mai nei. Ko Ahorangi Smith te Upoko o te Kura Maori ki te Whare Wananga o Waikato, ko Taakuta Roa tetahi o nga pouako matua. Hei taa te Minita Whakawhanake Maori a Te Ururoa Flavell, kei a raua nga pukenga me te mohiotanga ki te kawe i enei turanga rangatira e rua ki te Roopu Whakamana. Kei te whakakapi raua i nga turanga i noohia ra e Taa Doug Kidd raua ko Taa Tamati Reedy.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2016, UMA Broadcasting Ltd: www.waateanews.com
