Listen Now: 
Kei te whai tapuwae a Hare.
Kua rere a Kahika Hare araa Prince Harry ki Otautahi whai muri tana haerenga ki Rakiura.
I poowhiritia a ia e Ngai Tahu i Waihoopai inanahi hai taa Taa Tipene O'Reagan kaumaatua o Ngai Tahu kei te whai a Hare i nga tapuwae o tana koroua ki te tirotiro i nga whenua taiao e raahuitia ana ki te tikanga whakaruruhau.
Ki taa Taa Tipene ano he roa te hononga o te Maori ki te whaanau o Kahika Hare no te waa i a Kuini Wikitoria.
Statoil me mutu te tuuhura hinu.
Ko te mahi ma tetahi roopu Maori ki te whenua o Norway kia iinoi atu ki te paaremata iwi taketake o reira kia aukati te mahi koowiri hinu paatata atu ki te aakau o Te Taitokerau.
Hai taa Mike Smith tetahi o te roopu raa ma te poroteehi a haapori, ma te wero a ture, ma te karanga atu ki nga whenua o te ao e whakamohio atu ai nga aawangawanga.
Hai taa Smith ano ahakoa te hiahia o te kaawanatanga o Aotearoa ki te whakatairanga i nga kaupapa rapu hinu kua haina kirimana a Norway ki te whakaruruhau i nga motika o iwi taketake.
Otaakou ka aawhina i nga mahinga rangahau.
Ka whai tuuranga te Whare Waananga o Otaakou ki te whakaniko i nga mahi rangahau i raro i te mana whakahaere o te roopu rangahau Maori o Nga Pae o te Maaramatanga.
Kua whakaroa i te kaupapa a Nga Pae araa ki te hautuu tonu i nga mahinga rangahau.
Kaati ka whakapaa atu ratou ki nga kairangahau huri noa tae atu ki nga haapori Maori, ki nga iwi hoki.
He mahi arohanui kei te mahia.
Na te aawhina me te tautoko o te roopu e kiia nei ko te Ahikaaroa Trust e kuhu atu ana etahi whaanau i te Taitokerau ki o ratou whare tuatahi.
Hai taa kaiwhakahaere a Reuben Taipari he wero nui i etahi waa ki te hanga whare ki nga whenua Maori engari ma te piripono ki te kaupapa ka taea.
Hai taa Taipari ano ko te hiahia kia whakapai ake te ahua o te noho a nga whaanau Maori i tana rohe.
Haki, he pai te tauira koru.
Kua tae ki te waa ki te whakarite i tetahi ahua hou, i tetahi tuakiri hou mo Aotearoa.
Koia te karanga a kaitoi Otis Fizzell kua tuhia tana tauira he koru me tana hiahia kia mahue nga paanga ki te haki uniana o Ingarangi ki a ia he tohu o mua.
I toa tana tauira i tetahi whakataetae ki roto o Taamaki i tera tau i reira nga tauira maha.
Pakihi paataka kai.
Kua hangaa he pourewa hou ki te whakatairanga i nga kai me nga inu Maori mo te hokona atu ki nga whenua o taawaahi.
Ko te pakihi Maori o Poutama tera na ratou tetahi tohu penei me te paataka kai te ahua i whakarite ai me taa ratou kii he tohu hoki te paataka kia whakakotahi ai nga pakihi Maori kia mahi ngaatahi.
Copyright © 2015, UMA Broadcasting Ltd: www.waateanews.com
RELATED NEWS
