Listen Now: 
Tai Poutini kino te ua.
Na te hekenga o te ua taataa kua waipuketia etahi takiwaa i te Tai Poutini o te Waipounamu.
E rima nga kura kua katia i te taone o Kawatiri me te rere puukeri o te wai ki nga huarahi i Maawhera, i Reefton.
E mea ana te tari tiinei ahi e taea hoki te aha?
Ko te mea kee e matapae ana ka tatuu ano te ua makerewhatu i te ahiahi nei ki tera rohe whaanui.
Mookete nama nui.
Kua paparua te nama aa mookete hoko whare i te tekau tau kua mahue ake nei ki runga i nga pokowhiwhi o nga kaipupuri kaainga.
He aawangawanga no nga tohunga oohanga ki te hanga wera o te maakete hokohoko engari hai taa ratou ano e kore te maakete nei e pahuu i te roanga o te waa poto.
Rua rau piriona taara te nama mookete i tenei waa ki etahi he nama weriweri tera.
Te titiro puku ki etahi atu.
Ko te tikanga o nga mahi puurahorua ki te Moana Nui a Kiwa ki hea ranei he whakaruruhau i a Aotearoa.
Koia te whakautu a kaiwhakahaere mahinga tirotiro o mua a Taa Bruce Ferguson hai whakautu i nga whakapae koia taa Aotearoa e pai ai.
Aapiti atu hai taa Piriimia John Key ka whai te roopu puurahorua o te GCSB i te ture aa kei te hee etahi whakapae e rere taiaawhio ana i tenei waa.
Arotake kaupapa hao ika.
Kia tekau nga hui ka tuu huri noa te motu ki te matapaki i nga tohutohu kua puta mai i te arotake o nga anga mo te whakataunga hao ika Maori.
I tohungia taua arotake 2015 i roto i te ture hao ika Maori 2004 te tikanga kia whakaaetia tetahi ara whai hua hai tohatoha i nga rawa.
Hai taa Matiu Rei tiamana o Te Ohu Kaimoana ma nga hui e tuu mai nei ka tupu te aaramatanga o nga iwi ki nga paanga o nga tohutohu i te arotake e korerohia nei.
Pakihi Maori, whakatupuria.
Ka whakarahi ake te roopu take tauhokohoko o Aotearoa i to ratou tautoko i nga pakihi Maori kia hora atu ki taawaahi.
Hai taa Liz Te Amo kaiwhakahaere Maori o te roopu tauhokohoko nei e aro ana ratou ki te whakaputa i te kaha o te oohanga Maori ma te mahinga ngaatahi ki nga kamupene Maori me o ratou rangatira.
Matakaarapa ka pehea?
He whakatau tautohenga te whakaaetanga o te Kaunihera o Horowhenua kia tuku parakino ki te motu o Matakaarapa engari tera pea he pai ka puta ki te iwi kaainga ahakoa to ratou whakahee ki te tukuna o te parapara.
Kei taua moutere etahi urupaa o Ngati Whakatere engari kaahore ratou e waatea ana ki te haere ki era waahi tapu taa te mea kei runga whenua Paakeha ahatia ko te taapaetanga a te Kaunihera ki te haukaainga tera tonu pea ma ratou e whakarite huarahi kia whakapaa nga Maori o reira ki o ratou waahi tapu.
Copyright © 2015, UMA Broadcasting Ltd: www.waateanews.com
RELATED NEWS
