Listen Now: 
Paatea Kiriata
Ka whakaritea ki te kiriata te waiata rongonui o Poi E.
E mea ana a Sue May te kaiwhakatairanga i te kaupapa ka aratohu i te tuuranga o Dalvanius Prime i te tupu o te waiata ko etahi atu waahanga o te kiriata ka whakaatu i nga mahi tuuturu no te waa i waiata tuatahitia a Poi E.
Ka whakauruuru hoki ko etahi o nga whakawhitinga korero ki te Karapu Maori o Paatea. Heoi ano ko Tereapi Kahi te kaiwhakahaere matua o te kiriata.
Whaatua Whakatuu Whare
E kaikaa ana a Ngati Whaatua ki te whakangao puutea ki nga take whakatuu whare i Taamaki Makaurau hai oranga mo te iwi, hai oranga mo te haapori whaanui.
Hai taa Philip Davis tiamana o te iwi kua rite mai ratou ki te whakakii aaputa i Taamaki Makaurau, ki te whai waahi ki nga mahi hai whakamaamaa i nga uauatanga noho whare o te waa.
Kei raro i to ratou ringa pakihi ko Ngati Whaatua tera kei te whakahaere i nga whare neke atu i te kotahi rau te maha ka riihi atu etahi ki te tari whare.
Waipuke Taangata
Kua waipuketia te tauranga wakarererangi o Taamaki Makaurau e te tini manomano o nga tuuruhi 780 mano te tatauranga mo Tiihema.
Ko nga iwi o Haina me Amerika nga roopu maha ake me te tirohanga he nui ake nga ara rererangi kei te tuuwheratia ki nga whenua o te ao kia haramai ki Aotearoa.
Kaati e menemene ana nga kaiwhakahaere pakihi ki te tupu o te kaute tuuruhi i te tau kua ngaro nei.
Kua piki te utu o te hinu.
Tera pea kua pau te whitinga o te raa ki nga utu o te penehiini me te tiihara.
I tenei raa tonu kua piki i te whaa heeneti aua utu ko te pikinga tuatahi tera mai te marama o Oketopa.
E meingatia ana kua heke te utu o te hinu na te hekenga haere o to tatou taara.
Ki taa te kamupene hinu o BP kua huri te tai…ko te paatai a etahi ahea nga kamupene hinu e whakapiki ookawa i a ratou utu.
Tokoiti nga kaiwhakawaa Maori.
Kia maha ake nga kaiwhakawaa Maori ka tika.
Koia te karanga a nga roia Maori whai muri te korero 28 noa iho nga kaiwhakawaa i Aotearoa he Maori.
Hai taa Tai Ahu roia Maori mehemea ka kite i te maha o nga kaiwhakawaa Maori ma reira ka whai mana te puunaha ture.
E ai ki nga korero horekau he kaiwhakawaa Maori kei te Kooti Matua, horekau kei te Kooti Piira, horekau kei te Kooti Taiao, horekau kei te Kooti Tuu Mahi.
Kei te Kooti a Rohe me te Kooti Whenua Maori te nuinga o nga kaiwhakawaa Maori e mahi ana.
Whakatairangatia te tuakiri Maori.
Me aronui ki te haa o te tangata whenua.
Koia te tohutohu a Pat Spellman o Tauranga Moana ki tana Kaunihera a Rohe me tana whakapae he ngoikore te kaunihera ki te whai i taua huarahi.
Kei te whawhai a Spellman kia whakareorua i nga tohu huarahi ki Tauranga me tana kii ehara i te mea e piripono ana te kaunihera ki nga iwi o te rohe me huri ratou ki te haapai ake i te ahurea Maori hai waahanga motuhake o te tuakiri o Tauranga.
Copyright © 2015, UMA Broadcasting Ltd: www.waateanews.com
RELATED NEWS
