January 31, 2014
Sealord, he kamupene e oke ana.
Kua whaaki a Sealord he nui te utu o taa ratou putanga ki waho o tetahi mahinga hii ika i Argentina.
Kua hokona atu to ratou hononga pakihi ki a Yuken i tera tau he nui te ngarohanga puutea.
No kona kua heke te puutea hai hoatutanga ma te hoa pakihi o Sealord araa ko Aotearoa Fisheries tera ki ana kaipupuri hea a iwi.
Hai taa Whaimutu Dewes tiamana o Aotearoa Fisheries e matapae ana ka huri te tai kia pai ake nga hua puutea i te tau 2014.
UN Maori
Whakatika i nga rerenga keetanga motika tangata kei te patu haere i te Maori ki nga takiwaa o te hauora, o te ako, o te mahi, o te utu puutea.
Koia te karanga a Ahitereiria ki te Kaawanatanga o Aotearoa kei roto i te tukanga arotake a te United Nations.
Ko Norway, Slovenia me etahi atu whenua kua korerohia o ratou aawangawanga me te tumanako kia aronui nga whenua pera i a Aotearoa ki te Whakapuakanga o nga Motika o Iwi Taketake.
Kaati ka whakatinana i te arotake pokapoka whaanui mo Aotearoa ki Geneva i te raa nei.
Teina Pora ka waatea ki te whawhai i tana kaupapa.
Ka waatea a Teina Pora ki te hari i tana kaupapa ture ki te Kaunihera Nui i Raanana e kiia nei ko te Privy Council.
Rua tekau tau tana roa i te whare herehere mo te koohuru me te paawhera wahine aa ki etahi kua huraina korero e tohungia nei ki te harakore o Pora.
E mea ana te korero he nui tonu te mahi kei mua i te roopu wawao o Pora ki te whakatika i nga taunaki korero mo te kawenga o te kaupapa nei ki Ingarangi.
Kiihai a Donna Hall i hapa.
Kua whiua ki waho nga whakapae whakahapa, nga whakapae koretake hoki mo roia Maori a Donna Hall.
E mea ana te korero na Hall i korero ki nga roopu e toru i te waa kotahi i te tau 2006 aa i huri ai aua roopu katoa ki te hoko i nga whenua o Landcorp i taua waa.
Ki taa te kooti i te mutunga ake kiihai i Hall i aata takahi nga tikanga o te ture. Hai taa Donna Hall kua rere atu te kapua o te kaarangirangi i runga i a ia.
Kawerau he whare mahi hou.
60 miriona taara ka utua kia whakahou te wheketere hanga pepa a kamupene SCA Hygiene i Kawerau.
Ka whakapai ake i etahi haangarau i to ratou whare mahi kua whakawhaanuitia.
I reira te Piriimia a John Key inanahi mo te tuuwheratanga o nga taapiritanga hou.
200 nga kaimahi kei reira kee e mahi ana me te kii ka hanga i etahi tuuranga mahi hou.
Te tikanga kia karo i te wero o nga mahi a nga kamupene o Aahia i te maakete whakataetae o te ao mo te whakarato i nga momo pepa ki te ao.
Kaati tokomaha nga kaimahi Maori e mahi ana i te wheketere raa.
Nga whakahoutanga toi.
Ma te whakahoutanga o te Kaunihera Toi ka kaha ake te kitenga o nga toi Maori.
Koia te korero a Minita Toi a Chris Finlayson me tana kii tokowhaa neke atu ranei nga mema hou e whakarite ai he Maori.
Ka whiriwhiri hoki he komiti tohutohu.
Hai taa Finlayson ano he mea nui kia mohio ai nga kaitohutohu Maori ki nga tikanga Maori me ona ahuatanga tae atu ki nga mohiotanga toi.
Copyright © 2014, UMA Broadcasting Ltd