April 03, 2017
Tokomaha ngaa uri maori kei roto i ngaa whare herehere
Tokomaha ngaa uri maori kei roto i ngaa whare herehere
Me kakama te Kawanatanga, otira, te iwi Maori hoki ki te kimi rongoaa mo te take e kii pohapoha nei o tatou whare herehere i nga uri Maori. Koira te karanga a Tom Hemopoo, kaiawhina i nga mauhere Maori.
Mana Tu, arai mate huka
E rua ira kati toru miriona taara kua whaaia e Takuta Matire Harwood kia pai ai tana rangahau, mena ra kei roto i te kaupapa Whanau Ora etahi tikanga motuhake hei awhina i te Maori ki te kaupare atu i te mate huka. Ko Mana Tu te ingoa o te rangahau, a, ka titiro hohonu ki nga ahuatanga o te noho a nga whanau Maori, mei kore e tupono ka kitea etahi tohu, he aha e tuuperepere ai te tipu o te mate huka ki waenganui i te maha o nga whanau Maori.
Tohu huarere o te motu
Kia mataara ki ngaa whakawhiu aa Taawhirimaatea. Koira te akiaki aa Niwa. I patua rawatia a Ahitereiria e Huripari Debbie i ngaa raa kua mahue ki muri, aa, e mea ana te koorero, ka rongo hoki taatou i aana kinonga, ahakoa kua tino ngoikore haere toona kaha. Kei te mea mai a Niwa, hei ngaa raa tata e tuu mai nei ka nui noa atu te ua ka heke ki runga i a taatou katoa.
Kua mate te tuahine o te kiingi maori
Ko Kiritokia Te Toomairangi Adrianne Gail Paki, he maareikura o te Kaahui Ariki kua ngaro i te tirohanga kanohi, ono tekau maa whaa oona tau. Koia te tamaiti tuarua o Te Kuini Tapairu a Te AatairangiKaahu, he nui oona paanga ki roto o Waikato Tainui, ka mutu, he tino pou ia i te ao kapahaka i roto i ngaa tau ki muri mo te kapahaka o Taniwharau. I teenei wa, kei te marae o Te Puea te taonga o te mate nei e takoto ana, ka hoki atu a ia ki Waahi Paa i Raahui Pookeka hei te ata apopo.
Te mate rewharewha Typhoid
Kua puta te paanui ohorere ki te whakamoohio mai ki a taatou, he ngaangaara hou, he mate kino rawa atu e hoorapa haaere ana ki waenganui i a taatou, ko Typhoid. No te rangi nei, tekau ma tahi taangata kua mau i teenei mate Typhoid, ka mutu, i whakakoikoia ngaa raatonga hauora o Taamaki Makaurau, kua mahuta ake teenei mate i teetahi roopuu haapori ki teetahi o ngaa whare karakia poroniihia i Taamaki Makaurau tonu. I teenei wa, kei te kimi tonu ngaa taakuta i te maataapono o teenei mate, engari, ko eetahi o ngaa whakahou ki a taatou, kia tika raa te horoi i ngaa ringaringa, aa, mena ka aniani te mahunga, ka piki ake raanei te taukapa o te toto, haere ki to taakuta.
Amazon Warrior anga whakamua
Kua tukuna e te iwi o Ngaati Kahungunu to raatou waka hourua,Te Matau a Maui, ki te whakamoohio atu ki ngaa heeramana o te Kaipuke Amazon Warrior, kaaore ngaa iwi o Te Ikaroa Raawhiti e whakaae ana ki wa raatou mahi raawekeweke i te papamoana ki reira.
Copyright © 2017, UMA Broadcasting Ltd: www.waateanews.com