March 27, 2024
Timoti Karetu | He whakarauora i ngā reo iwi taketake o Aotearoa me Wēra te mahi
Mō te roanga ake i te whā tuangahurutau ku tūhonohono ai a Tā Timoti Kāretu ki ngā mātanga reo o Wēra kia ū mai ko a rātou rautaki whakarauora reo taketake ki Aotearoa.
Hei tā Kāretu, nā rātou o Wēra te ara i para mō tātou, nā ko te huihuinga o ngā mātanga reo waiata o te ao Maōri me Wēra i tēnei marama tētehi o ngā puawaitanga o taua ara.
E 15 ngā kaitito waiata Maori, Werā anō hoki ka whakakotahi ai ki te kaupapa o Māori/Cymraeg SongHubs, nā te ohu a APRA AMCOS NZ ku kōkiritia.
Ko tā Kāretu, ‘ i te tau ’76 i haere au ki reira ki te tirotiro me aha pea tātou o konei e ora ai tō tātou reo, i runga anō i te rongo koira te iwi kaha ki te whakaora mai i tō rātou reo. Ana i haere atu au i runga i tērā whakaaro, me te tika o taku haere atu nā te mea, nā tērā haerenga ōku ki reira i whakakaha ake taku akiaki i te reo Māori kia tahuri mai ki tōna reo. I te wā i au i tū ai hei rangatira mō Te Taura Whiri i Te Reo Māori ka kī mai a Koro Wetere ki au, koia hoki taku rangatira, me huri koe ki te ao ki te tiro i ngā iwi kei te mate haere o rātou reo kia kite kei te aha rātou.’