Listen Now: 
Pooti a Ngāi Te Rangi ki a Nahinara
Hei tā te iwi o Ngāi Te Rangi o Tauranga Moana, ki te waitohu te Kāwanatanga i te whakataunga a Hauraki, ka pooti a Ngāi Te Rangi ki a Nahinara hei te kōwhiringa pooti e tū mai nei. Nō ngā rā tata nei i puta ai te pānui i te Minita i ngā take Tiriti i a Andrew Little, kei te waitohu ia i te whakataunga a Hauraki, a, ka whakahokia te whakataunga ki te marama o Hakihea i te tau rua mano tekau mā ono. Hei tā te toihau o Ngāi Te Rangi a Charlie Tawhiao, he raupatu tēnei i ngā whenua o Ngāi Te Rangi. Hei tāna, tekau mā toru ngā tono whakahē kua tae atu ki te Roopu Whakamana i te Tiriti e pā ana ki te whakataunga a Hauraki, a, kua kii te Kīngitanga o Waikato, mā rātou e kimi rangāwateatanga i waenganui i a Hauraki me ngā iwi o Tauranga Moana.
Tohe ngā Kaimahi Maina ki Taharoa
Kei te tohe ngā kaimahi ki ngā kaipupuri whenua, ngā kaipupuri whenua ki ngā kaimahi i tētahi waahi maina onepū rino i te takutai o te uru o Waikato, ko te take kua tīmata nei ki te tohe, nā te mea, kua uru ētahi kaiwhakahaere hou ki te maina, a, kei te raweke rātou i ngā tikanga whakahaere kua roa nei e tū ana. I hokona te maina o Taharoa i NZ Steel, e ngā kaipupuri whenua o Taharoa C me Melrose Capital i tērā tau. Hei tā te māngai mō te Uniana Kaimahi o E Tu a Joe Gallagher, kaore ēnei kaiwhakahaere hou i te maina i te whakapakari i te whanaungatanga ki ngā kaimahi, nō reira, ka porotū ngā kaimahi a te rua tekau mā whā o Hereturikōkā.
Tohu Wāhine Whai Mana
Kua whai waahi ētahi māreikura o te ao Māori ki roto i ngā whiringa toa mō ngā tohu Wāhine Whai Mana, arā, Women of Influence awards. Ko Farah Palmer o te Poari o Te Uepū Whutupōro o Aotearoa, ko te toihau hou o Te Taura Whiri a Rawinia Higgins, ko te kaimahi rangatahi o Waipareira a Jana Nee me Natasha Kemp o te roopu Te Kaha o Te Rangatahi ētahi o ngā wāhine Māori, tērā pea ka whiwhi tohu.
Te Whare Wānanga o Wikitōria ki Whanganui-a-Tara
Kua mana te panonitanga o te ingoa o te Whare Wānanga o Wikitōria, arā, atu i tēnei wā, haere ake nei, ko tōna ingoa hou ko Te Whare Wānanga o Te Whanganui-a-Tara, ko tōna ingoa Māori, ko Te Herenga Waka. Ko Te Herenga Waka te ingoa o te marae o te whare wānanga. Hei tā te amorangi o te whare wānanga a Neil Paviour-Smith, e rua ngā hua nui o te panoni ingoa, tuatahi, kia kaha ake te hono a te whare wānanga ki tōna waahi tū, arā, ki Te Whanganui-a-Tara, tuarua, kia pai ake tā rātou whakatairanga i te whare wānanga ki te ao me te kore e pōhēhē, he whare wānanga tēnei kei Ingarangi, kei hea ake rānei nā te mea, ko Wikitōria tōna ingoa.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
