December 13, 2023
Kua tae ki te wā kia mahuetia te Treaty reo Pākehā: Ferris
Kua tae ki te wā kia mahuetia te Treaty reo Pākehā ki te taha – kia mātamua ai ko te Tiriti reo Māori, koia te momo i whakamanatia e ngā rangatira i te tau 1840.
Koina nei te kī a Tākuta Ferris, nō Te Pāti Māori, nōna e tuku ana i tana kauwhau tuatahi ki te Pāremata hei mema mō te rohe pōti o Te Tai Tonga ināpō.
I kī a Ferris kua kore he take o te tohetohe mō te whakamāoritanga o ngā tuhinga e rua me tana whakaāe mārika rawa atu ki te kī a te Kaiwhakawā Tumuaki o mua, a Sian Elias, “tē taea te taupatupatu – ko te Tiriti ko te tuhinga reo Māori.”
Hei tā Ferris anō, he haraki rawa atu te whakaaro i tuku noa ngā tūpuna i ō rātou motuhaketanga me ō rātou rawa ki te Kuini o Ingarangi.