November 01, 2023
‘Hei hoa mauroa’ – Tuhinga rotarota nā Aperahama Hurihanganui
I tērā wiki I tū ai te pō tuku taonga mō ngā tohu Pikihuia, he whakanuitanga tērā mō ngā kaituhi māori, pakimaero mai, ruri mai, tuhinga poto mai anō hoki.
I whai tohu to tātou kaikōrero e whai ake nei I te tohu ‘Poetry in te reo Māori” mō tōna ruri o ‘Hei Hoa Mauroa’ .
Kei raro iho nei te ruri nā Aperahama Hurihanganui.
Hei Hoa Mauroa
Aperahama Hurihanganui
ka takoto tīraha a Pāpā
ānō nei ko te tōnga o te rā
pō te ao i te katinga o ōna mata
kei te noho āmaimai te whānau
e karapoti ana ngā whakaahua
ka ora te ngira a te tohunga
ngiiiiiii ngi ngi ngi ngiiiiiii
mā te aha i te ngira Pākehā
hei whakairo i te whakapapa Māori
ka toitū ki te kiri
e whaihua ai te whakatauākī –
‘ ko tō ringa ki ngā rākau a te Pākehā’
‘ ko tō ngākau ki ngā taonga a ō tīpuna’
ngiiiiiii ngi ngi ngi ngiiiiiii
ka riro tōna rae i te ngau a te ngira
ko mamae hei hoa maupoto, ko mataora hei hoa mauroa
tetē ōna niho me he kurī
whakamakiki ōna waewae me he rākau
rere ōna roimata me he awa … kāti.
‘ kei te pai koe?’ … ‘āe’ … ‘āna, hoake tonu tāua!’
ngiiiiiii ngi ngi ngi ngiiiiiii
ko ā taipakeke waiataata, ko ā taiohi kōhimuhimu
me ā taitamariki katakata
e haruru ana i te whare
nā konā i tau ai tōna wairua
ko te hiringa mahara i pōkaihia
kia mahea ai tōna pākinikini, kia au ai tāna moe
ngiiiiiii ngi ngi ngi ngiiiiiii
ka takatakahia e ia
te ara wairua ki tua whakarere
ki Rarohenga rānō
te orokohanga o te moko
ka pōhiri mai a Uetonga, a Mataora, a Niwareka
ka puta ki te whaiao, ki te ao mārama
……… … … … ………
ka ngū te ngira a te tohunga
ka matike mai a Pāpā
ānō nei ko te uranga mai o te rā
whiti ana te tīwhana i te rae me he hihi
ka āhuru te whare, ka kaikā te whānau
ko Rūaumoko e ngunguru nei
ko ōna mata ka oho, ko onamata ka ora