July 04, 2023
E koa ana a Tatauranga Aotearoa ki te mahitahi ki te Kāhui o Rauru
Mā te Takapou Tupua a Te Kāhui o Rauru me Tatauranga Aotearoa e pai ake ai tā te iwi mārama ki ā rātou ake raraunga.
Koia te kōrero a te kaitohutohu kōtuitanga arataki i Tatauranga Aotearoa, a Mareta Savage, muri mai i te whakataunga o tā rātou whakaāetanga mahitahi ki te iwi i tērāwiki.
Hei tā Savage ko te mea nui ki a ia ko te kite i te mahitahi a te kāwanatanga me te iwi kia pai ake ai tā te iwi whakamahi i ā rātou raraunga.
“Te mea whakahirahira ki au nei, ko te āta noho tahi i runga i tēnei tūahuatanga te Takapou Tupua, i runga i tēnei āhuatanga te whāriki, e noho tahi ai, e mahi tahi ai, tēnei o ngā manatū o te karauna, o te kāwanatanga, me te iwi.”
I kī anō a Savage kei te tuwhera tonu ngā tatau ki ngā iwi katoa ka hiahia kia pai ake tō rātou mārama, otirā, tā rātou whakamahi i ā rātou raraunga.
Whakapā atu ki a Tatauranga Aotearoa mō ngā whakamārama.