Listen Now: 
Te Hunga Whai Penihana
Hei tā te Minita Whakahiato Ora a Carmel Sepuloni, kua tae ki te wā e rerekē ai ā tātou kōrero mō te hunga whai penihana. Koirā te take hei tāna, kua whakatūria e ia he Ohu, tekau mā tahi tāngata kei runga, hei tohutohu i te Kāwanatanga. Ko te toihau o taua ohu rā, ko te Komihana Tamariki o mua, a Cindy Kiro, ā, kei reira hoki a Tracey McIntosh o Tūhoe me Huhana Hickey o Te Tai Tokerau me Tainui. Hei tā Sepuloni, he mea whanawhana te hunga penihana e te Kāwanatanga o mua, arā, e Nahinara.
11 Tohora ki Kaupoko-nui i Manaia
Tekau mā tahi ngā tohora kua pae ki uta i te tonga o Taranaki, arā, ki Ka-upoko-nui i Manaia, a, kua riro ma te hapu o Ngāti Tu ēra rangatira o te moana e tiaki. Hei tā Bonita Bingham ō Ngāti Tu, he wheako hou tēnei mō rātou, engari, kei te tautoko Te Papa Atawhai i a rātou tae atu ki a Ngāti Wai me tō rātou kaumātua, a Hori Parata.
Te Whakahau a Shane Jones
Me ngakau nui ki te kaupapa. Koirā te whakahau a te Minita i ngā take Hanganga, a Shane Jones ki ngā umanga, menā rā e hiahia ana rātou ki te kuhu mai ki ngā rautaki hanganga pēnei i a KiwiBuild. Hei tā Jones, me aronui ngā umanga ki te whakangungu kaimahi, koirā tētahi o ōna hiahia mō rātou. Hei tā Jones hoki, kei a ia te kotahi piriona tāra hei whakapau māna ki ngā rohe, nō reira, me ngākau nui hoki ngā umanga ki te whakawhanake i ngā kaimahi i roto i ngā rohe.
Wally Haumaha Komihana Tuarua
Kua piki tūranga a Wally Haumaha i roto i te Manatū Pirihimana, arā, kua tohua ia hei komihana tuarua. Kei te whakakapi ia i te tūranga i mahue i a Viv Rickard. I tēnei wā, ko Haumaha te pou Māori o te Manatū Pirihimana. Hei tā te Minita i ngā take Pirihimana a Stuart Nash, he rangatira whai mana a Haumaha i roto i ngā hapori katoa, puta noa i te motu, a, koia hoki tētahi o ngā pou ārahi i te kaupapa Te Pae Oranga, arā, te whakawā i te Māori ki runga marae.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
