March 06, 2018
Whakatupu i ngā pakihi ki Hāmoa
Whakatupu i ngā pakihi ki Hāmoa
Ka whakarite te kāwanatanga i tētahi pūtea ki te tautoko i ngā wāhine me ngā rangatahi ki te whakatupu i ngā pakihi ki Hāmoa. Koia tētahi kōrero a te Pirīmia a Jacinda Ardern i tana haerenga ki te Moana Nui ā Kiwa i tēnei wiki. I te wā tonu e whakakaha ana te kāhui o ngā roopu Māori o FOMA i o rātou hononga pakihi ki ngā moutere. Kei te kī a FOMA me whakatupu hoki i ngā pānga ohanga ki ngā iwi taketake huri katoa te rohe whānui o te Moana Nui ā Kiwa.
Pūtea hoko kai mā ngā whānau
Te āhua nei, tokomaha ake ngā whānau e totoro ana kia whiwhi pūtea hai hoko kai mā rātou. Koia te kitenga o te Tari Pāpori i tētahi pūrongo, koia hoki te kōrero a ētahi roopu tautoko i Rotorua. E mea ana te Tari kua piki te 23 paihēneti te maha o ngā tohanga pūtea nā runga i te piki kino o ngā utu whakahaere kāinga. Hai tā rātou anō, ka tāronatia ētahi whānau kia waiho ko te kai hai utu whakamutunga ka mātua titiro ki ētahi atu utu.
Maunga nui kei mua i a Simon Bridges
Kia waimarie a Simon Bridges kia māringanui tā te mea he maunga nui kei mua i a ia ki te whakatahuri i te ngākau o te motu ki a ia. Koia te karanga a ētahi kaiwetewete kaupapa tōrangapū me tā rātou kī, kāhore te motu e whakarongo ana ki a Nāhinara i tenei wā. Ko te mea kē e tatari tonu ana a Aotearoa kia whakamārama mai te Kāwanatanga i tō rātou ahu pēhea me a rātou mahere a muri atu nei.
Te Ururoa Flavell ki te ao mātauranga
Ka hoki a Te Ururoa Flavell ki te ao mātauranga. Rima marama muri mai i te putanga ki waho o Pāremata kua uru atu ki te Whare Wānanga o Waikato ki tētahi tūranga whakaako, he tūranga teitei. E mea ana a māngai kōrero a Sarah Jane Tiakiwai kei a Flavell ngā pūkenga ki te whakanui i ngā mea katoa, ki te hāpai ake i ngā huarahi ako.
Kohikohi putea mo nga whanau tukinohia
Kua tīmata te kaupapa ki te kohikohi pūtea hai āwhina i ngā whānau e pāngia kinotia e te tūkino. Te tumanako kia whakapuare pūkoro ngā hāpori, kotahi rau mano taara te hiahia o ngā kaiwhakahaere. Neke atu i te 90 mano tamariki kei te pāngia nō reira e kii ana a Holly Carrington o te roopu SHINE mā ngā rourou o te aroha ka turuki i te kaupapa, ka whai hua ngā whānau i runga i te mōhio ka nui te tini e huhi ana.
Mate nga ika i te rawhiti o Tamaki
E mate haere ana te taunga ika i te rāwhiti o Tāmaki Makaurau, ko te maha rawa atu o te hunga hī ika me te parakino ngā tino raruraru o te wā. E mea ana ngā kaikōrero whakaora taiao no te Kāwanatanga o mua, no Nāhinara te hē. Kīhai rātou i aro ki ngā karanga ki te whakatika i ngā ture i ngā kaupapa i ngā mahi e pā ana ki te moana, i konā kua horo ngā ika i te whānuitanga o Hauraki te pau. Ka mutu he raruraru tino nui te āhua o te moana i ēnei rā.
Copyright © 2018, UMA Broadcasting Ltd: www.waateanews.com