February 04, 2018
Hauruatia ngā tamariki e tuakoka ana
Hauruatia ngā tamariki e tuakoka ana
Hei tā te peremia a Jacinda Ardern, inā kaha te Kāwanatanga ki te turaki i te tuakokatanga tamariki, kaore e kore ka kaha hoki tā rātou turaki i ēra atu take pāpori, take ohaoha e whakararu nei i o tātou whānau. Ko te whainga a te Kāwnatanga kia hauruatia te nui o ngā tamariki e tuakoka ana i roto i te tekau tau.
Tono āwhina ngā pakihi Māori
E atamai haere ana ngā ratonga pakihi o te motu, ā, e atamai haere ana ngā pakihi Māori ki te tono āwhina i aua ratonga. Koira tā Kahurangi Taylor o Ngāti Te Ata, kaiwhakawhanake pakihi i te Waikato Innovation Park. Hei tāna, tekau mā ono ōrau o āna kiritaki he pakihi Māori, mē te aha, e tautokohia ana aua pakihi Māori rā e New Zealand Trade & Enterprise (NZTE) me Callaghan Innovation.
Cheryl Stephens Kaareti o Waikato Tainui
Ko Cheryl Stephens te kaiwhakahaere matua hou i te kāreti o Waikato-Tainui. Tekau mā rima tau te noho a Stephens ki te whare wānanga o Awanuiarangi. He uri ia nō Te Arawa me Taranaki. Hei tāna, ko ngā take matua kei mua i te kāreti, me pēhea te whakawhanake tonu i ōna āhuatanga.
Copyright © 2018, UMA Broadcasting Ltd: www.waateanews.com