Listen Now: 
Whakatipu rawa ki ngā rohe o tuawhenua
E ai ki te Minita Whakawhanake Rohe a Shane Jones, e rikarika ana ia ki te tae-a-tinana atu ki ngā rohe o tuawhenua ki te kōrero ki a rātou, me pēhea rā te whakatipu rawa ki runga i o rātou whenua. I tae atu ia ki Te Wairoa inanahi ki te kōrero mo te kaupapa a te Kāwanatanga e tō ai te kotahi piriona rākau. Hei tāna, he nui ngā hua ka puta ki ngā rohe i taua kaupapa, arā, he hua-a-ōhanga, he hua-a-mahi, he hua-a-taiao hoki.
Eke te uara o Ngāi Tahu ki te $1.6 piriona
Kua rua tekau tau a Ngāi Tahu e whakatipu ana i ana tahua pūtea me āna rawa, inaianei, me tahuri ki te whakapakari i tōna ahurea me ōna tāngata. Koirā tā te kaiwhakahaere i a Ngāi Tahu, taa Lisa Tumahai. Kotahi rau, ono tekau mā ono miriona tāra te pūtea hemihemi a Ngāi Tahu i te tau pūtea, ko te tāpoi, te kaimoana me ngā mahi pāmu i whai hua. Kua eke te uara o Ngāi Tahu ki te kotahi ira kati ono piriona tāra.
Moana Jackson te Tohu kairangi hōnore
Kei te whakawhiwhia te matanga ture rā a Moana Jackson ki te tohu kairangi hōnore e te Whare Wānanga o Wikitoria. Hei tā te Ūpoko o te Whare Wānanga, a Tā Neville Jordan, e tika ana kia whakamanawatia a Jackson ki taua tohu, mōna i whakapau kaha ki te kōkiri i te maramatanga mo te Tiriti o Waitangi me ngā tika o te Māori i roto i ngā tau maha.
Kaiārahi 100 Te Rau Matatini
Kua whakarewahia e te roopu Te Rau Matatini he pae tukutuku hou e kitea ai ngā kōrero mo ngā mātāpono o ngā kaiārahi kotahi rau o te ao Māori. Hei tā te tāhūhu rangapū o Te Rau Matatini, a Maria Baker, ahakoa he roopu hauora rātou, ehara i te mea nō te rāngai hauora ngā kaiārahi o te pae tukutuku nei. Hei tāna, ko te matū o te kaupapa nei, kia ngākau whakapuke ētahi atu i te pānuitanga o ngā kōrero mō ēnei kaiarahi nei.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
