November 06, 2017
Kimi pirihimana hou
Kimi pirihimana hou
E ai ki te pirihimana Māori matua o te motu, me kimi pirihimana hou i ngā hāpori Māori i te tuatahi, i mua i te kimi pirihimana hou i ngā whenua o tāwāhi. Kei te tū ngā pihi o te iwi Māori ki te whakatau a te Minita hou i ngā take Pirihimana, a Stuart Nash, kia whakamāmā ake i te ara mo te kuhu mai ki tēnei whenua, kia tae mai ai te kotahi mano, waru rau pirihimana hou ki konei i tāwāhi. Hei tā Wally Haumaha, me rite te kanohi o ngā pirihimana ki te kanohi o ngā hāpori, nō reira, me kanohi Māori.
Ngā take tūkino tamariki
Hei tā te Perehitini o te Roopu Wāhine Māori Toko i te Ora a Prue Kapua, me kōrero te Kāwanatanga ki ngā kaimahi kei te mura o te ahi e mahi ana mo ngā take tūkino tamariki i roto i ngā rātonga tiaki tamariki a te Kāwanatanga, hei aha te kōrero noa ki ngā kaiwhakahaere tari Kāwanatanga. Hei tā Reipa, i roto i ngā rā kotahi rau tuatahi o tā rātou noho hei Kāwanatanga, ka whakarewa rātou i tētahi Whakatewhatewha nui e pā ana ki ngā whakapae, he mea tūkino ngā tamariki i roto i ngā rātonga tiaki tamariki i ngā wā o mua. Hei tā Kapua, kua roa tōna roopu e manaaki ana i ngā tamariki me ngā whānau i noho nei hei papa ki tēra tūkinotanga.
Te Ture Whenua Māori
Tēra pea ka tū tonu te Rātonga Whenua Māori i raro i te Minita Whakawhanake Māori hou, engari, ka rerekē tōna āhua i tēra i tohua ai e te Minita o mua, e Te Ururoa Flavell. Hei tā te Minita hou a Nanaia Mahuta, kaore a Reipa, Aotearoa Tuatahi me Ngā Kākāriki i rata ki te whakahoutanga o te Ture Whenua Māori, heoi, ka aro rātou ki ētahi o ngā take i hua ake i te wā e whiriwhirihia ana ēra whakahoutanga, pēra i te whakapakari i ngā Uepu Whenua Māori kia pai ake ai tā rātou whakahaere i o rātou whenua. Hei tā Mahuta, me panoni hoki i ngā whakaritenga me te āhua o te Ratonga Whenua Māori i kōrerohia ai e te Minita o mua.
Copyright © 2017, UMA Broadcasting Ltd: www.waateanews.com