October 25, 2017
Nanaia Mahuta hei Minita Whakawhanake Māori
Nanaia Mahuta hei Minita Whakawhanake Māori
Hei tā te tāhūhū rangapū o Waipareira a John Tamihere, kei a Nanaia Mahuta ngā pūkenga me te mōhiotanga kia tū hei Minita Whakawhanake Māori. Hei te rā nei, ka whakawahia ngā Minita hou ki o rātou tūranga, ā, hei tā Tamihere, ko te manako kia whai hua ngā kaupapa Māori i te whakaūnga o te māngai o Hauraki Waikato, arā, o Mahuta ki te tūranga Minita Whakawhanake Māori. Ko Willie Jackson, te Minita Whakawhanake Māori tuarua, Minita hoki i ngā take Whai Mahi, ko Peeni Henare te Minita o Whānau Ora.
Ngā whenua o Ihumatao
E whai whakaaro ana a Fletcher Building ki te tuku i te hauwhā o ōna whenua i Ihumātao ki te iwi kia tau ai te puehu. I waho te roopu SOUL i te hui-ā-tau a Fletchers inanahi e porotū ana i te kaupapa whakatū whare a Fletchers ki Ihumātao. Whā rau, waru tekau whare ka whakatūria ki Otuataua. Hei tā tāhūhū rangapū o Fletchers a Steve Evans, ka pana rātou i ngā kaiporotū o SOUL e noho whakatāuteute ana ki te whenua, mena rā kei reira tonu rātou hei te wā o te whakatū i aua whare.
Tangihia a James 'Tex' Rickard
I tangihia e te iwi o Whaingaroa a James 'Tex' Rickard, i te wiki nei. Koia te hoa tāne o Eva Rickard. Hei tā tā rāua tamāhine a Angeline Greensill, i haere a Tex ki te āwhina i a Aotearoa i te pakanga tuarua o te ao, i a ia e tekau mā rima tau noa iho ana. I ōna tau taipakeke, i āwhina a Tex i te iwi ki te whakatū i te marae o Poihākena, i te Tarahiti o Whaingaroa Kite Whenua, te tarahiti e manaaki ana i te papa hahau pōro o mua o Whaingaroa, me te Tarahiti Whenua o Te Kōpua.
Tūranga hou mā Ahorangi Linda Nikora
Kei te pōwhiritia a Ahorangi Linda Waimarie Nikora ki tana tūranga hou i te ata i runga i te marae o Waipapa i te Whare Wānanga o Tāmaki. Kei te nuku ia i te Whare Wānanga o Waikato ki Tāmaki, kia tū ia hei kaihautū hou i te roopu rangahau o Ngā Pae o te Maramatanga.
Copyright © 2017, UMA Broadcasting Ltd: www.waateanews.com