Ka mihia te Wiki o te Reo Māori e te Minita

©Waateanews.com

11 Mahuru 2017

Pānui Pāpāho

Ka mihia te Wiki o te Reo Māori e te Minita

Kua takoto te mānuka e te Minita Whanaketanga Māori mō te Wiki Reo Māori i tōna tau 42 ka tīmata i te rangi nei

“Whakamahia te Wiki o te Reo Māori kia panonihia ai tō ao ki tua noa atu i te wiki nei” te kī a Minita Flavell.

“Ahakoa te taumata o tō reo Māori, ka taea e te katoa te panoni tētahi āhuatanga o tō rātou ao ki te tautoko i te pikinga ake o te reo Māori i ō tātou hapori.”

“Tērā pea he mea ngāwari noa pēnā i te kī ‘Mōrena’ i ia ata, i te kōrero ‘kia ora’ rānei kaua kē ko te ‘thank you’.”

E kī ana te Minita ko te oranga ake o te reo Māori hei reo kōrero o ia rā, o ia rā i te pāpori tētahi o ngā whāinga o Te Ture mō Te Reo Māori (te Māori Language Act) 2016.

“He whakamaumaharatanga pai Te Wiki o te Reo Māori o tēnei whāinga ki te kōrero me te tautoko i tō tātou reo kia rangona ai i ngā wāhi katoa i ngā wā katoa.”

E ai ki te Minita ko te pine #kōrero he mea i whakaputaina hei wāhanga o ngā mahi whakanui i a Rotorua nōna i whakawhiwhia ki te taitara o te Tāone reorua tuatahi o Aotearoa.

“Mō te hunga e hiahia ana ki te whakaatu i tō rātou tautoko mō te reo Māori, me ēra hoki e hiahia ana ki te whakamahi i te reo kia nui ake te reo i tō rātou ao ia rā, ia rā.”

“Ahakoa te pai o te reo o te tangata, ko te mea nui ko tō tātou hiahia ki te tautoko me te whakarauora ake i tō tātou reo tangata whenua nei.”

E kī ana te Minita ka whakaputaina he pine #kōrero hiriwa he mea motuhake hei wāhanga o ngā mahi whakanui i Te Wiki o te Reo Māori.

“Ko te kaupapa o Te Wiki o te Reo Māori ko te Kia ora te reo Māori, ā, ka harikoa taku ngākau ki te kite i ngā tāngata o Aotearoa e whakamahi ana i tērā hei hiringa, hei ranga wairua ki te whakapiki i te nui o te reo Māori i ō rātou ao.”

MUTU

Ētahi atu kōrero

He whakarāpopototanga o Te Ture mō Te Reo Māori 2016

I whakamanatia Te Ture mō Te Reo Māori (the Māori Language Act) 2016 e te Pāremata i Paengawhāwhā/Apireira 2016.

Kei roto i te reo Māori me te reo Ingarihi te tuhinga, ā, ko te ture tuatahi tēnei o Aotearoa kia waiho ko te reo Māori hei reo mana ā-ture o te tuhinga.

Ko tāna ko te whakahau i te kaingākau o te Karauna ki te mahi ngātahi ki ngā Iwi me Ngāi Māori ki te whakamarumaru me te whakatairanga kaha i te reo Māori, ā, i whakatūria hoki Te Mātāwai, he hinonga hou hei ārahi i ngā mahi whakarauora ake i te reo Māori mā ngā iwi me Ngāi Māori.

Mahuru Māori: 1 – 30 o Mahuru

Nō te 1 o Mahuru i tīmata te Mahuru Māori tuatoru. Ko tā te Mahuru Māori he akiaki i ngā kaikōrero Māori ki te kōrero i te reo Māori mō tētahi wāhanga, mō te katoa rānei o te marama. Neke atu i te 600 tāngata kua rēhita ōkawa ki te mahi i te Mahuru Māori, he neke atu i te 1,000 i hono atu ki te Whārangi Mahuru Māori o Pukamata (Facebook). Nō te tohunga reo, kaitautoko hoki a Paraone Gloyne te whakaaro i te tuatahi. Kei te whakahaeretia te kaupapa e Te Wānanga o Aotearoa. Mahuru Māori Facebook – https://www.facebook.com/groups/mahurumaori/

Hīkoi Reo Māori: 11 o Mahuru

11am, Rāhina/Mane, 11 Mahuru/Hepetema, Cenotaph, Lambton Quay, Wellington

E tono mai ana Te Taura Whiri i te Reo Māori – Māori Language Commission i ngā rōpū katoa i ngā rāngai tūmatanui, tūmataiti rānei me ngā whare wānanga, ngā wānanga, ngā kura auraki, ngā kura Māori, ngā pokapū tākaro, ngā pokapū kōhungahunga, ngā kura pūhou, ngā kōhanga reo, ngā tīma hākinakina, ngā rōpū, ngā kapa haka, ngā marae me ngā hapū puta noa i te rohe o Pōneke kia haere mai ki te hīkoi hei whakarewa i Te Wiki o te Reo Māori – Māori Language Week 2017.

http://www.tetaurawhiri.govt.nz/events-and-promotions/hikoi-whakangahau-mo-te-reo-maori-en-nz/

Te Atakura o te reo Māori: 13- 14 Mahuru

E whakanui ana i te whā tekau tau mai i te whakatakotoranga o te Petihana Reo Māori ki mua ki te aroaro o te pāremata, ka tū he hui taumata rua rā te roa e whakanui ana i te hainatanga o te petihana. https://teatakurasite.wordpress.com/

Moana Reo Māori

Te whakaputanga o te Whitiāhua Moana ki te reo Māori.

https://www.facebook.com/moanareomaori/
 

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Te Arawa saxophonist silenced as Minarapa Mitai-Ngātai mourned Co chair, Te Kotahitanga o Nga Hapu Ngapuhi Rudy Taylor Haka dance threatre set for Otautahi