May 07, 2017
Ka nehua te pou o te Wananga o Aotearoa i te ra nei
Ka nehua te pou o te Wananga o Aotearoa i te ra nei
Hei te ata nei ka nehua a Marie Panapa, tetahi o nga tino kuia o Te Wananga o Aotearoa. I mate ia i te mate manawa i roto i te hohipera o Waikato i tera wiki, ka hee te manawa i a ia e mahi ana i tana mahi i te papa o te Wananga o Aotearoa ki Apakura. Hei taa te tahuhu rangapu o te Wananga a Jim Mather, ko Panapa tetahi o nga tauira tuatahi o te Wananga, na wai ra ka tuu hei pou arahi i Te Wananga i runga i toona Taumata Kaumatua. Hei te tekau ma tahi karaka te nehu ki O-Tawhao Marae.
Me pehea te karikari whenua
Kei te mahi tahi te Whare Wananga o Otakou me nga marae o Ngati Kahungunu, kia mohio ai te iwi me pehea te karikari i te whenua kia kitea ai nga taonga o te ao tawhito. Kua tuu etahi wananga i runga i nga marae o Pukehou me Kahuranaki, a, hei taa Ahorangi Richard Walker o te Whare Wananga o Otakou, he mea nui kia mahi tahi nga maatanga whai para me nga iwi kia pai ai te tiaki i nga waahi karikari taonga, kei raru i te ngau a Hinemoana me te ngau a te hunga whakawhanake whenua.
Kei te anga whakamua a SOUL
Katahi ano a Pania Newton o te roopu SOUL ka hoki mai i te Whakakotahitanga o te Ao. Ko te take i haere atu ai ia ki reira, kia rongo ai te Whakakotahitanga o te Ao mo te whaanakotanga o to ratou whenua i Ihumatao, e Fletchers me te Kaunihera o Tamaki.
Pehea te huarahi o te waa a Te Ururoa Flavell?
I runga i te hotaka o Marae inanahi, ka puta te korero i a Te Ururoa Flavell, Minita Whakawhanake Maori, kaore e kore he pakanga nui kei te haere ki waenganui i a raua ko Tamati Coffee o Reipa mo te turu o Te Waiariki. Hei taa Coffee, ka riro ma te hunga i pooti ki a Mana i te kowhiringa pooti whakamutunga, e kopou te mangai mo Te Waiariki i tenei tau. Kaore a Mana i te whakatuu tangata ki Te Waiariki i raro i te whakaaetanga i waenganui i a Mana me te RTM. Hei taa Flavell, kaore a Reipa i tohu i tetahi Maori kotahi ki tana rarangi ingoa, mai i te tahi ki te tekau ma rima, a, kaore e kore ka riri nga kaipooti Maori ki tera.
Ko Christina Asher i whai hua
Kei te whakawhiwhia te toihau o te roopu o Nga Aho Whakaari a Christina Asher, ki te tohu Mana Wahine i te Film And Television awards i tenei tau. Ahakoa ka tuu te Po Whakawhiwhi Tohu a tera marama, kua whakamohiotia keetia atu a Asher koia te kaiwhiwhi i te tohu Mana Wahine kia pai ai te whakawhiwhi i taua tohu ki a ia i te Ahurei Kirata o Te Wairoa hei nga wiki nei.
Me whakahou ngaa kaipooti i te kawanatanga
E iwa tau tatou i raro i te Kawanatanga o te Nahinara, me te aha, tokomaha tatou e oke ana. Koira taa Kiri Allen, te roia Maori kei te turanga rua tekau i te rarangi ingoa a Reipa. Hei taana, i tipu ake ia ki te Tai Ra Whiti i te ngahuru tau waru tekau, a, kaore ratou i mohio he aha te kainga koretanga i taua wa, i te mea, he whare to tena whanau, to tena whanau, engari, kua tino rereke inaianei.
Copyright © 2017, UMA Broadcasting Ltd: www.waateanews.com