May 02, 2017
Kia whakaako i te hiitori o Ngati Tamaoho
Kia whakaako i te hiitori o Ngati Tamaoho
Ko tetahi wahanga nui o taa matou whakataunga tiriti, ko te whakauunga me te whakamanatanga ano o te hitori o to matou iwi ki te tonga o Tamaki. Koira taa Dennis Kirkwood o Ngati Tamaoho. No nga rangi whakataa nei i waitohu ai ratou i te whakaaetanga e tutuki ai taa ratou whakataunga. Tekau miriona taara te rahi o te putea, engari, hei taa Kirkwood, ehara te putea i te mea nui. No te ra inanahi i huraina ai he tohu i Patumahoe, tata ana ki Pukekohe kia mohio ai te katoa, i nga wa o mua he papa kainga, he urupaa hoki no Ngati Tamaoho e tuu ana ki reira.
He mangai matua e tautoko ana i a Marama Fox
E tautoko ana au i a Marama Fox, he hiahia nooku kia whai reo motuhake tonu te iwi Maori ki te whare paareamata. Koira taa te toihau o Ngati Kahungunu a Ngahiwi Tomoana. Kua whakaae hoki a Tomoana ki te whakahaere i te kaupapa rapu pooti a Fox i te tuuru o te Ikaroa Rawhiti. I mahi te kaipupuri i te turu o Te Ikaroa Rawhiti, a Meka Whaitiri ma Ngati Kahungunu Inc i mua i tana haere ki te whare paaremata, heoi, hei taa Tomoana, ehara i te mea e huri tuaraa ana ia ki a Whaitiri, engari, ki a Reipa ke.
Kei te huri haere ngaa Kaakaariki
Kua timata te roopuu Kaakariki ki te amio haere i te motu, kia mohio ai ratou ki nga kaupapa nui a tena hapori, a tena hapori. Hei taa Jack Mcdonald kaiwhakataetae i te rohe pooti o te Taihauaauru, ma enei hui ka mohio te roopu Kakariki, he aha nga kaupapa hei whakatairanga ma ratou i tenei tau pooti.
Te toiora mo te katoa
Kua whakaae te Kaunihera o Te Whanganui-a-Tara kia utua ana kaimahi whakapai whare ki te utu toiora ara ki te Living Wage. Whitu rau mano taara te utu tapiri ki te Kaunihera, ia tau, engari, hei taa ratou, e tika ana kia whiwhi aua kaimahi i te utu toiora kia haaneanea ake ai taa ratou noho ki tenei ao.
Kei te anga pehea a Maanu Paul?
Kua tuku tono a Maanu Paul ki te Kooti Teitei o Rotorua e kokoraho ana i te katoa o nga takutai moana o te motu mo te iwi Maori whaanui. Kia tahuri ake tatou.
He pukapuka hou mo Kamupene D
Kua timata a Harawira Craig Pearless ki te rangahau i nga korero mo Kamupene D o te roopu rua tekau maa waru, kia oti ai i a ia he pukapuka mo era taikaakaa o te ao Maori. Ko te nuinga o nga hoia o Kamupene D i ahu mai i nga rohe o Waikato, Maniapoto, Taranaki, Te Whanganui-a-Tara, Manawatu tae atu ki te Wai Pounamu. Kia tahuri ake tatou.
Copyright © 2017, UMA Broadcasting Ltd: www.waateanews.com