April 11, 2017
He aha te huarahi mo taua hunga?
He aha te huarahi mo taua hunga?
Me whakahaere whakatewhatewha e pa ana ki te tukinotanga o nga tamariki i raro i te maru o nga tari Kawanatanga i nga wa o mua, kia whiti ai te ra ki runga i te tukinotanga e mahia tonutia nei ki nga tamariki i roto i aua tari. Ko Paora Crawford-Moyle o te Whare Wananga o Kunenga Ki Purehuroa tetahi i tukuna ki nga tari Kawanatanga hei tiaki ma ratou, nona e tamariki ana. Hei taana, ehara i te mea ma te Manatu Oranga Tamariki e mutu ai te tukinotanga o nga tamariki i roto i nga tari Kawanatanga, engari, ma te panoni waiaro ke.
Drug Foundation Maori
E ai ki te tuapapa e kiia nei ko te Then Drug Foundation, ma te whakarereke pea i nga ture tarutaru o tenei whenua ka ea nga tutohinga i roto i te purongo a te Rooipu Whakamana i te Tiriti, ara, i roto i te purongo Tu Mai Te Rangi, e pa ana ki te kaha hoki atu o te Maori ki te whare herehere. Hei taa Ross Bell o te Tuapapa nei, wha tekau oorau o nga Maori kei roto i te hinaki, i tukuna ki reira mo te takahi i nga ture tarutaru.
He mate nui te Typhoid
Ki te haere koe ki tawahi, kaua e inu i te wai i nga kati wai, kei paa te mate Typhoid ki a koe. Koira te whakatupato a Taakuta Lilly Fraser o te Ratonga Hauora o Turuki. No nga wiki nei i mate ai he tangata i te hohipera o Tamaki i te Typhoid, a, tokomaha i kaha te maauiui, na te paa o taua mate ki a ratou.
Te paihana 1080 tino kino mo ngaa manu
Hei taa te minita o Te Papa Atawhai a Maggie Barry, kei te whai hua o tatou ngahere i te ruiruitanga o te taaoke tekau / waru tekau ki roto. Hei taa Kevin Prime o Te Papa Atawhai, kei te ruia tera taaoke ki roto i nga ngahere ki te patu i nga kiirearea hoha, penei i te wiihara, engari, i etahi wa, ko nga manu taketake ke te papa.
Whakahokia mai nga koiwi ki te kainga
E tika ana kia tuohu te Kawanatanga ki te hiahia o nga whanau kia whakahokia mai nga koiwi o nga hoia o Aotearoa e takoto mai ra i nga urupaa o tawahi, ki te kainga. Hei taa Ron Mark o Aotearoa Tuatahi, ko te mate ke, kua roa rawa te Kawanatanga e kakii maaro ana, ka mahue taa ratou whakaae ki tenei take, e hia ke tau ki muri.
Kia anga whakamua nga rangatira o apoopoo
Ko te aronga nui mo te hunga kaumaatua o Waikato Tainui i teenei waa, he akiaki, he taunaki i te hunga rangatahi, kia pakari raatou hei ngaa raa o anamata. Koiraa taa Tom Roa, kaumaatua o Waikato, Tainui, e paa ana ki te hui nui i whakatuungia ma te hunga taiohi e whakapapa ana ki a Waikato, Ngaati Maniapoto me Ngaati Kahungungu.
Copyright © 2017, UMA Broadcasting Ltd: www.waateanews.com