Listen Now: 
Whakahokia mai ngaa koiwi ki te kainga
Kua roa te Kawanatanga e kii ana, tino kore nei ratou e whakaae kia whakahokia mai nga koiwi o nga hoia o Aotearoa i mate, i tanumia hoki i nga pae o te pakanga ki Hingapore me Maaraia, heoi, kua kihirua ratou. Hei taa te Minita i nga Take Ika-a-Whiro a David Bennett, e whakaae ana te Kawanatanga kia hahua ake era koiwi, mena koira te hiahia o nga whanau.
Te panui tuarua mo te whenua ki Point England
Kua whakatau Nga Kakariki kia kaua e pooti i te panuitanga tuarua o te pire e hoko whenua ana i Point England Tamaki Makaurau ki a Ngati Paoa. Hei taa Marama Davidson o Nga Kakariki, e tautoko ana ratou i te whakaaro kia whai whenua te iwi, engari, he maha nga hapa kei roto i tenei pire, me te aha, na te Minita i nga Take Hanganga, ara, na Nick Smith e hapa nui nei.
Te pire whakahou Ture Whenua Maori
Hei taa te mangai torangapu mo Te Taitokerau a Kelvin Davis, kei te tino whakahee te nuinga o nga kaipupuri whenua o tona rohe pooti i te pire e whakahou ana i Te Ture Whenua Maori. Hei taana, kei te maharahara te nuinga ki nga ahuatanga hou mo nga poraka whenua Maori, ara, ma te tekau oorau noa iho o nga kaipupuri e whakatau ka ahatia aua poraka whenua.
Nga tauira o te whare wananga o Wikitoria
Kei te rere te karanga i nga tauira Maori o te Whare Wananga o Wikitoria kia whakamamahia ake te utu ki nga tauira mo te haere ma runga pahi, ma runga tereina hoki. E ai ki te roopu Ngai Tauira, i etahi wa, kotahi rau taara i te wiki ka pau i te tauira ki te hopu pahi, hopu tereina ranei kia tae atu ki nga akoranga o te whare wananga. Hei taa te roopu Ngai Tauira, e tika ana kia whakaritea he utu tauira mo te haere ma runga i nga waka tumatanui o te rohe.
Kei hea nga tauira maori?
Kei te kimi tauira Maori te kura e kiia nei ko te Enspiral Dev Academy. Ko te kaupapa matua e whakaakona ana i roto i taua kura, ko nga pukenga e taea ai e te tangata nga pae tukutuku te hanga. Tekau ma waru wiki te roa o tenei akoranga a ratou, a, ka timata hei te haratua.
Te toutouwai ki Taranaki
Kotahi rau, tekau tau te reo o te toutouwai e muu ana i runga i te maunga o Taranaki, engari, katahi ano te toru tekau ma ono toutouwai ka tukuna e te Papa Atawhai ki te whenua taapui o Pureora i te putake o te maunga, i runga i te wawata kia raangona ano tona reo e paaorooro mai ana. Hei taa Jamie Tuuta, mangai mo nga iwi o Taranaki, ma nga manu nei ka piki te mauri ora o te maunga tapu o Taranaki.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
