March 26, 2017
Labour stance on Pt England
Labour stance on Pt England
E hiahia ana a Ngati Paoa ki te hui ki a Reipa e pa ana ki te pire Pt England. Hei taa Hauauru Rawiri, kaihautu o Ngati Paoa. E tumeke ana te iwi kua tahuri a Reipa ki te whakahee i te pire e tuu ai i a Ngati Paoa te toru rau whare ki Pt England, ara, ki te Wai o Mokoia. Hei taa Rawiri, e ahu mai ana tenei pire i taa ratou whakataunga tiriti, no reira, ko tenei whakahee a Reipa, he whakahee i te whakataunga tiriti a Ngati Paoa.
Kawhia Finlayson
Kei te whakaheenga te whakapae, i ngana etahi ki te whakahotaetae i te wehenga atu o te Minita i nga take Tiriti, ara, o Christopher Finlayson i tetahi hui i Kawhia inanahi. E ai ki te whakapae, i rongo etahi o nga uri o Ngati Hikairo, i te hui te Minita ki a Ngati Maniapoto i Kawhia, katahi ka tae atu ki te waahi i reira te hui, ki te aukati i tana wehenga atu. E hiahia ana a a Ngati Hikairo, ma ratou ano taa ratou ake tono mo to ratou rohe e whakahaere, kaua ma tetahi atu. Hei taa ratou, ko ratou te mana whenua o Kawhia, engari, kaore tetahi o nga kaikokiri matua i te tono raupatu a Maniapoto, a Nanaia Mahuta i powhiri i a ratou ki te hui. Hei taa Mahuta, he hui tenei ma Maniapoto me ona kaumatua, kaua ma Ngati Hikairo, no reira, kaore he take o te powhiri mai i a ratou. Hei taana ano, ahakoa te whakamaatau a nga uri o Hikairo ki te whakaporearea i te wehenga o te Minita, auare ake.
Tatauranga
Kua piki te RTM ki te whaa orau o te tautoko i roto i nga tatauranga torangapu hou o te wa. Mena ka tuu te kowhiringa pooti inaianei, ka whai te RTM i nga tuuru e rima i roto i te whare paaremata, a, ka riro ma ratou te Kawanatanga e whakawahi, e kopou. Wha tekau ma ono oorau te nui o te tautoko ki a Nahinara i tenei wa, toru tekau oorau ki a Reipa, tekau ma tahi oorau ki Nga Kakariki. Kua heke iho a Bill English i roto i nga tatauranga mo te tangata e tautokohia ana kia tuu hei peremia, ko te mea e tuarua ana ki a ia i roto i nga whakaaro peremia i tenei wa, ko te kaiarahi tuarua i te roopu Reipa a Jacinda Ardern
Maranga Mai Purongo
Kei te hapa etahi waahanga o te purongo Maranga Mai, araa, te puurongo i tuhia hei arahi i te whakatutukihanga o te tono raupatu a Ngaapuhi. Koira taa Hone Sadler, toihau o Tuhoronuku. Hei taana, kei te whakaroherohea a Ngapuhi, me te aha, tootara waahi maha, he kai na te ahi.
Smiler Trophy
E kitea ana te whakaetanga o nga mahi ahuwhenua Maori i roto i te wa potopoto noa nei. Koira taa Kingi Smiler, kaiwhakahaere i te whakataetae Ipu Ahuwhenua. No te Tai Tokerau, Wairarapa me te Rohe Potae nga paamu e toru kua uru atu nei ki te whiringa toa mo taua Ipu i tenei tau, a, hei taa Smiler, tekau tau noa nei te paamu o Omapere Rangihamama i Kaikohe, e mahi ana i taana mahi
Manuhiri Matariki
E rikarika ana a Ngati Manuhiri ki te whakahaere i te ahurei Matariki ki roto o Tamaki Makaurau i tenei tau. Hei taa Mook Hohneck, mangai mo Ngati Manuhiri, kei te mahi tahi ratou ko te Kaunihera o Tamaki i tenei tau ki te whakatinana i te kaupapa i amo tiitokohia ake e Ngati Paoa i tera tau. Hei taana, ahakoa ehara a Manuhiri i tetahi o nga mana whenua rongonui o Tamaki, he wa pea tenei e horapa haere ai to ratou ingoa ki te marea. Hei te tekau o Pipiri ka timata te ahurei Matariki.
Copyright © 2017, UMA Broadcasting Ltd: www.waateanews.com