Listen Now: 
Kelvin Davis mangai take tiriti
Kua tohua a Kelvin Davis hei mangai take tiriti mo te roopu Reipa. Hei taa Davis, ki te Kawanatanga a Reipa i tenei tau, ka kaha tonu ia ki te whakatutuki i nga kokoraho a nga hapu me nga iwi. Hei taa Martin Fisher, matanga torangapu, he mea pai tenei whakaaro o Reipa kia tuku i tenei mahi take tiriti nei, ki a Davis, na te mea, he kaitorangapu tino pakari ia.
Te Tarahiti o te Papakainga o Parihaka
Kua timata te Tarahiti o te Papakainga o Parihaka ki te rapu whakaaro e pa ana ki te tatau pounamutanga i waenganui i nga uri o Parihaka me te Karauna. Hei taa te tahuhu rangapu o te Tarahiti, a Puna Wano Bryant, he wa tenei e hoki komuri ai nga whakaaro o nga uri ki nga tohutohu a Te Whiti raua ko Tohu. Hei taana, he rereke tenei whakaunga tiriti i etahi atu. Hei te ra tapu nei ka tuu te hui a te Tarahiti ki Hikoikoi Marae i Pito-one, Te Whanganui-a-Tara.
Riri Te Runanga o Ngati Ruanui ki te Mana Taiao
Kei te riri Te Runanga o Ngati Ruanui ki te Mana Taiao o te Motu. Hei taa te Runanga, kei te whakauaua te Mana Taiao i nga whakaritenga mo te tapae korero e pa ana ki nga mahi maina onepuu i te takutai o Taranaki. Hei taa Debbie Ngarewa-Packer, tahuhu rangapu o Te Runanga, i te wa i tono tuatahi ai a Trans Tasman Resources ki te maina onepu, i pai te Mana Taiao, i kooataata aa ratou mahi, inaianei, ano nei, kei te kati i te kuaha.
Te wiki o te reo Maori
Kua puta te tahuhu korero mo te wiki o te reo Maori i tenei tau, ara, ‘Kia ora te reo’. Hei te tekau ma tahi o Mahuru ka timata te wiki o te reo Maori. Hei taa te tahuhu rangapu o te Taura Whiri a Ngahiwi Apanui, i whiriwhirihia te kaupapa "Kia ora te Reo" na te mea, e mohiotia whanuitia ana te mihi "Kia ora" , tuarua, ko te wawata o tatou katoa kia taea e tatou te kii, kei te "ora" to tatou reo.
Whakawhaanuitia te hotaka HPV
Kei te whakawhaanuitia atu te hotaka e tohu ana i te momo mate pukupuku e kiia nei ko te HPV. Tokomaha nga waahine Maori e raru ana i tenei momo mate pukupuku, engari, kua whakarewahia he kaupapa e tirohia ai nga tane me nga waahine i waenganui i te iwa ki te rua tekau ma ono nga tau, mo te kore utu, kia kite ai mena kei roto i a ratou nga tohu a taua mate. Hei taa Takuta Lily Fraser o te Ratonga Hauora o Turuki, i etahi wa ka kitea nga tohu a te mate nei i nga korokoro o te tane, no reira, e tika ana kia tirohia hoki ratou.
Nga nama a te Roopu Whakataunga Tiriti o Tuwharetoa
Kua patua e te Roopu Whakataunga Tiriti o Tuwharetoa, nga nama i te iri ki runga i tona upoko. Hei taa te Toihau o te Roopu nei, a Rakeipo Taiaroa, i patu ratou i waa ratou nama katoa i tera tau, a, kua whakawhanakehia te uara o aa ratou rawa ki te toru tekau miriona taara. Na te hee o nga whakangaotanga putea a nga mangai o mua o te Roopu, i tata pakaru ai te pukoro o te iwi, engari, kua ara ake ano i roto i ana kaupapa mahi tahi ki etahi atu roopu o Ngati Tuwharetoa.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
