Aukatihia nga waka ki runga i a Maungakiekie

Aukatihia nga waka ki runga i a Maungakiekie

Hei tera tau ka aukatihia te haere a nga waka ki te tihi o Maungakiekie. Kia mana tera, katahi te Kahui Maunga Tuupuna o Tamaki ka tahuri ki te aukati i te haere a nga waka ki nga kotihi o Maungarei, Owairaka, Puketapapa me Takarunga. Hei taa Paul Majurey o te Kahui, ma enei whakaritenga hou e rahui nei i nga waka ki era maunga, ka haumaru ake te hunga hikoi, ka haumaru hoki te mana me te tapu o aua maunga. Hei taana, tokomaha nga taangata o te hapori e tautoko ana i te rahuitanga o nga waka i nga tihi o era maunga.

Aukati te mahi whakaora paua ki Kaikoura

Kei te whakapono te Manatu Ahumahi, ko te aukati i te mahi a te hunga whakaora paua ki roto i a Kaikoura, te huarahi tika hei whai. Mai ra ano i te ru whenua i tera wiki, kua whakapau kaha etahi o te hapori o Kaikoura ki te whakaora i te taupori paua i pae ki uta rawa. Heoi, hei taa Ben Dalton o te Manatu Ahumahi, kua korero ratou ki o ratou matanga putaiao, a, hei taa aua matanga, ko te mahi tika ke hei mahi, he waiho atu i nga paua kia riro ai ma ratou ano te ara ki te moana e kimi.

Panaia he tangata ki Aotearoa

Kua panaia he tangata, he whakapapa iwi moemoeaa tona, i te whenua o Ahitereiria ki Aotearoa nei, i raro i nga tikanga taimaro a Ahitereiria mo te hunga manene. Hei taa Kelvin Davis o Reipa, kei te haere mai he roopu kaumatua no te iwi moemoeaa ki te tiki i taua tangata me te whakahoki i a ia ki tona whenua taketake, ara, ki Ahitereiria. He whakapapa Maori hoki to te tangata nei, a, i panaia ia, na te mea, kaore i a ia te tohu e whakamana ana i taana noho ki Ahitereiria. Hei taa Davis, e haere mai ana te roopu kaumatua iwi moemoeaa, i te mea, hei taa ratou, ehara i te mea ma te Kawanatanga o Ahitereiria taana noho ki Ahitereiria e whakamana, engari, ma tona whakapapa ke.

Turangawaewae mo nga takatapui

He uaua te kimi turangawaewae moou i tenei ao tauwhitiwhiti, mena ra he takatapui koe, koia tonu ra te take ko turangawaewae te kaupapa matua o te hui-a-tau a Ngati Takatapui i tuu ki te marae o Nga Kete Wananga i Manukau i nga rangi tata nei. Hei taa te mangai mo te hui, a Levi Bristow, tokomaha nga taangata i tae atu ki te hui, engari, tokomaha hoki kaore tonu i te mohio, kei hea te waahi tika mo ratou i tenei ao, ara, kei hea to ratou turangawaewae.

Teteira Kirkwood kaumatua hou o MIT

Kua whakauungia a Teteira Kirkwood o Ngati Tamaoho hei kaumatua hou o te wananga takiura o Manukau. Kua heke iho a Kukupa Tirikatene o Ngai Tahu i taua turanga, engari, ka awhina tonu ia i a Kirkwood me te wananga i etahi wa.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Auckland should be ready for Tamihere Greens fumble on seabed mining Rautaki