March 10, 2016
Kainoho kookuhu
Tangohia atu tetahi whare kei te takutai o Port Levy i te Waipounamu kia kokiri i nga mahi whakatupu.
Koia te karanga a Ngai Tahu ki te Kaunihera o Otautahi.
E kii ana a Peter Ramsden, tiamana tuarua o Te Runanga o Koukourarata, ka nui te hoohaa o te haapori kei reira tonu taua whare e tuu ana aa kua tae ki te waa ki te whakahoki i te whenua raa kei runga ko taua whare me tetahi whaanau Paakeha e mea ana, kaahore ratou e piirangi ana ki te neke.
Whakatuma pahuu
Kua tae ano nga karere whakatuma pahuu i runga waea ki nga kura o te motu.
Ko te Kura Tuarua o Wellington High me te Kura Tuarua o Hutt Valley etahi o nga kura o te waa kia pokea e te karanga, kei to ratou taha he pahuu.
Oti atu kua whakatahia nga kura aa kua tiiwaha atu ki nga Piriihimana.
Koromatua whakaae
Kua karangahia etahi koromatua i to ratou tautoko mo te pire Ture Whenua Maori.
Ko Meng Foon o Tuuranganui a Kiwa tetahi o nga kaitautoko me tana kii ka whakapai ake i te mahinga o te whenua.
Kaikohe akomanga
Kei te whakawhaanui te Waananga o Aotearoa i ana mahi ki Kaikohe.
E whakatuu ana i nga akomanga hou me te kii a maangai korero a Shannon Halbert kei reira hoki etahi waahi noho mo nga aakonga.
Taapiri atu ki tena, kai te kaha whakatupu te Waananga i nga waahi ako mo nga tauira kura tuarua o te takiwaa.
Poipoi tamariki
Ka nui te hiahia ki nga kaitiaki hai poipoi tamariki araa foster carers.
Koia te karanga a Barnardos Aotearoa me te iinoi kia huri a Taamaki Makaurau ki te poipoi i tetahi tamaiti.
Heoi ano ko te wiki poipoi tamariki tenei. Hai taa Barnardos ano, ka kaha tautokohia nga kaitiaki tamariki katoa. Ehara i te mea ka waiho kia noho taratahi ratou.
Kua tau te raruraru
Na te urunga atu o aapiha piriihimana Warwick Moorehu, kua mutu rangimaarie te whakapaeanga paatata atu ki Kawerau. Kei te karangahia he toa a Moorehu.
Kua hopukia a kaipupuhi Rhys Warren 27 ona tau.
kaare he raruraru i te waa i whakahauraro ai taua tangata. Naana nga piriihimana e whaa i pupuhi inanahi.
Ko taa te kupu maahaki a Moorehu ko nga piriihimana kei te whara, ko ratou kee nga toa.
Copyright © 2016, UMA Broadcasting Ltd: www.waateanews.com