Listen Now: 
Puutea whakangao.
Haramai te ahua o te puutea hai aawhina ki te raruraru mo te taha ki te whakatuu whare i roto o Taamaki Makaurau.
Koia te whakautu a Len Brown koromatua o Taamaki ki te korero a Paula Bennett Minita Whare Paapori ma te kaawana e whakangao kia rua miriona taakaro ki te whakatuu i nga whare ohotata 120 te maha.
Hai taapiritanga taua puutea a te kaawana ki te 500 mano taara hai hoatutanga ma te Kaunihera ki nga whare pera a nga tau e rua e tuu mai nei. Hai taa Brown kua mahi ngaatahi ia ki te kaawana aa he pai te anga whakamua.
Rangitahua kua raahuitia.
He kaupapa pai te whakaritenga o tetahi waahi whakaruruhau mo nga rauropi o te moana i nga moutere o Rangtahua.
Hai taa Ruth Dyson maangai tiaki taiao o Reipa ahakoa he timatanga pai tera kia kaha ake nga tikanga whakamarumaru taiao ki reira koia te wero kei mua i te kaawanatanga.
Ka mutu e kii ana a Dyson me mihi atu ki nga roopu taiao no te mea kei te tuu toa ratou i tenei waa.
Aaraitanga marama, he ataahua.
I tenei waa kei te kitea te aaraitanga marama ki te raki o te ao i te waa tonu o te raakaunui o te marama.
Kia tuu te marama ki tana pounga ka nui ake tona ahua e ai ki nga kaipuutaiao.
E meingatia ana ka aaraia te marama ina pahure atu ia i te ata o Papatuuaanuku i etahi waa he kauruku whero te ahua o te marama. Kaahore i kitea te ahuatanga nei no te tau 82.
Manawa rangahau.
Kua whiwhi puutea a kairangahau Taakuta Corina Grey ki te titiro me kore e mate wawe te hunga rawakore Maori Pasifika o te mate manawa.
Hai taana he nui nga korero rangahau i kohia hai tautoko i te whakapae ka mate wawe.
Koni atu i tera ka rangahau i te ahua o nga rerekeetanga kei te aarai i nga tuuroro kiri parauri.
He aha te rongoaa?
Ko te karanga kia aukatingia te whakawhaanau peepee o etahi maamaa he tirohanga whaaiti ki nga take hauora.
Koia te karanga a Mere Balzer o Te Runanga o Kirikiriroa he whakautu ki te whakapae tera pea ka whai i te huarahi raa mo nga whaea mehemea ka tuukinotia a ratou tamariki kaatahi ka tahuri a CYFs a wai atu ki te tango i aua tamariki.
Hai taa Balzer me rapu huarahi kia whai hua te katoa hai te mutunga o te raa.
Tatauranga kuukupa.
Ko wai ka mohio ki te tika ki te hee ranei o nga tatauranga e karangahia ai e nga kaitoorangapuu.
E ai ki etahi kairangahau ko te Minita Take Piriihimana a Anne Tolley tetahi i whiu whakapae ki nga keenge i runga i nga korero hee rawa atu.
Ka mutu e kii ana aua kairangahau ki nga kaitoorangapuu kaua e teka kaua e whakatakoto korero parau ki te whakamanamana i a koutou ki te whakaiti tangata ranei.
Copyright © 2015, UMA Broadcasting Ltd: www.waateanews.com
RELATED NEWS
