Listen Now: 
He whakataetae tata te korero i te raki.
Tokomaha nga kainoho o te Taitokerau kua huri ki te tuku moata i a ratou pooti i mua i te raa ookawa mo te pooti ki te rohe auraki o Northland a te Raahoroi.
E mea ana nga kaiwhakahaere ki nga kaipooti Maori hou pena whiriwhiri nei ratou ki te pooti a te Raahoroi ka herea ratou ki te raarangi Paakeha tae atu ki te tau 2018.
Hui korero mo te matenga ohotata o nga peepee.
Kei te whakahaerehia tetahi hui hauora i te raa nei ki te Taitokerau ki reira matapaki ai te matenga ohotata o nga peepee.
Kei te tuu te hui raa i te marae o Kohewhata ki te tonga o Kaikohe me te mohio 90 paiheeneti o nga peepee ka mate ohotata i te Taitokerau he Maori.
Ko te tikanga o te hui he whakatenatena i te whaangai i te waiuu ki nga peepee me te haumarutanga o nga tikanga moe.
Kei reira e korero ana ko etahi o nga tohunga matenga ohotata pera i a Taakuta David Tiipene Leach o Ngati Kahungunu.
Mahia te mahi Naahinara!
Kaua tatou e whakarite i te kaupapa whaangai tamariki hai take toorangapuu engari me whaangai i o tatou tamariki noho hiakai ka tika.
Koia ano te korero a etahi kaiwetewete take paapori.
Hai taa ratou kei a wai te haepapatanga o te mahi kotahi te kupu korero ko te kaawanatanga.
E meingatia ana kaua ranei a Naahinara e huri ki te whakaiti i nga maatua me te kii kia kaha tatou katoa ki te karanga atu ma te kaawanatanga nga taimahatanga e whakatika.
Kaiahuwhenua kei paakinotia anotia.
E whiitiki ana nga kaiahuwhenua i a ratou ano mo te tapahinga o nga hua puutea ki a ratou.
Koia te mahi i runga i te huringa o Fonterra ki te tope i taa ratou matapae tuku hua ki nga kaiwhakahaere paamu.
E mea ana te kamupene raa kei raro nga otinga a puutea i nga tumanakotanga o nga kaiahuwhenua na reira kia tuupato ratou i runga i te paahekeheke haere o nga maakete tauhokohoko huri noa te ao.
He aituaa wakarererangi i taawaahi.
Kei te kaute nga kaiwhakahaere o Wiiwii whenua i te utu nui o te tukinga wakarererangi i tenei ata ki nga pae maunga i reira kua mate te katoa o nga taangata 150 o runga.
I rere taua waka atu i Barcelona Paniora whenua ki Dusseldorf Tiamana whenua i te waa e taka ana i te rangi.
E mea ana nga tari puurahorua o Amerika te hanga nei kiihai tera waka rererangi i haukotingia e tetahi roopu whakatumatuma.
Ka mutu kei te tirohia te pouaka pango o taua waka kei reira etahi atu moohiohio haangai.
Te nuinga o nga paahihi no Tiamana me Paniora whenua.
He momo whakatuupato.
E ai ki nga kohinga raraunga mo te aituaa ki nga huarahi he roopu moorearea ake nga tuuruhi ki te whakaritea ratou ki nga kaihautuu waka o Aotearoa.
E mea ana te korero ko nga marama o Hanuere me Pepuere te waa kino mo te tukinga o nga waka huri noa na reira kei te karanga tonu nga roopu haumaru me whakakikii i nga tikanga taraiwa motukaa ko tetahi e kii ana me maarama mohio nga kaihautuu waka katoa ki te paanui i te reo Paakeha otiraa ki te paanui i nga tohu huarahi i Aotearoa.
Copyright © 2015, UMA Broadcasting Ltd: www.waateanews.com
RELATED NEWS
