Listen Now: 
Nga tukutuku aataahua.
Kei te hura i tenei raa ki New York nga moana tukutuku i hangaia e nga kairaranga 20 hai whakaraakai i te paatuu o Aotearoa ki te Whare o te Kaahui o te Ao.
Kei reira a Minita Maori o mua a Pita Sharples me te kii he mahinga toi tino motuhake nga tukutuku e korerohia nei.
Ki nga korero o te waa kua tupu te hootaka nei no te waa i whakarewaina te kaupapa e Sharples i te tau 2010.
Me huunuku pea?
Ki te kore e ahei ki te hoko whare i Taamaki Makaurau me haere kee ki Waikato. Koia te korero a te Piriimia a John Key inanahi.
Hei taana he whakaritenga te huunuku atu ki Waikato hai whakaarotanga mo te tokomaha e oke ana ki te hoko whare mo ratou.
Hai taa Key ano he tohu pai te piki o te utu miraka i tenei wiki mo te oohanga o Waikato.
He whakakotahitanga o te haapori.
He rangi motuhake ka tuu apopo hai whakanui i te raa o Waitangi i te marae o Hoani Waititi i te uru o Taamaki Makaurau.
Hai taa John Tamihere toihau o te Whaanau a Waipareira he pai te whakakotahitanga o te haapori ki raro i te korowai o te rangamaarie.
Hai taana ano he hui tera mo te whaanau ko te mea nui ko te whaanau he nui nga ngohe mo nga tamariki.
He whakaaturanga taketake.
Ka tuuwhera ki te iwi whaanui te Whare o te Rua Mahara o te Kaawanatanga a enei raa whakataa.
Kei reira te puka taketake o te Tiriti o Waitangi a he nui nga mahi ka whakahaerehia i Poneke hai whakanui i te raa o Waitangi ko te tuuwheratanga o te whare mahara tetahi.
E mea ana nga kaiwhakahaere ka waatea te iwi ki te titiro atu ki nga puka e iwa araa ko nga puka taketake o te Tiriti he mea motuhake i te huritau 175 no te hainatanga o taua kawenata.
E hari ana te Piriimia.
He rangimaarie te whakaekenga o te Piriimia ki runga o Te Tii Waitangi i tenei rangi.
I reira a Tiitewhai Harawira ki te aarahi i te Piriimia, horekau he raruraru koia te korero.
I tana wehenga i mea atu a John Key he pai nga mahi a te komiti o te marae.
Hai taana ano i rongohia te marino me te aaio ki runga o Te Tii.
He rautaki anga whakamua.
Haramai te ahua o te rautaki oohanga kua tukua e nga rangatira o te Taitokerau.
Koia te whakamihi a Maarama Fox rangatira takirua o te Paati Maori kei Waitangi ia i tenei waa.
E mea ana a Fox ko taua rautaki kei te whakaatu i te hiahia o nga iwi ki te whakatau i nga kaupapa whakahirahira ki a ratou.
Ahatia he mea ohorere ki a ia te aaputa kei waenganui i te hunga whai rawa me te hunga rawakore.
Copyright © 2015, UMA Broadcasting Ltd: www.waateanews.com
RELATED NEWS
