October 23, 2013
Ka rapa te uira.
Ka rapa te uira.
Kua tatuu ki te raa tuawhitu te ahi kaapura i NSW e muramura mai ana aa kei te haukotingia nga kaimahi patu ahi e te tukinga o te uira ki te whenua.
59 nga ahi kei te kaa tonu huri noa te rohe whaanui raka 18 nga kaapura e kore e whakahaeretia ana.
Taapiri atu ki nga paanga o te ahi kei te maaniania te whenua 7 rau te hunga tiinei ahi e whawhai ana i te wera horekau he ua e matapaetia ana a nga raa kei te haramai.
Kia mahara ki nga mahi papai.
He aawangawanga no etahi kei paakinotia te tangata na runga i nga whakapae kua korerohia mo te Kohanga Reo.
Ko taa Taariana Tuuria e whai ana a Whakaata Maori i te tauira a nga kaiwhakapaaho Paakeha ki te whakaparuparu i te iingoa o tetahi roopu Maori.
Heoi ano e kii ana a Hone Harawira ahatia nga korero kua putaputa mai e kore e taea te whakaiti i a Kahurangi Iritana Taawhiwhirangi me ona mahi papai pera ano tana toomua a Tiitoki Black.
Te Taura Whiri
E harikoa ana Te Taura Whiri i te Reo Maori , kua tae ake te whakapaaha a Whakaata Maori ki a ratou.
E ai ki te hotaka karere a Whakaata Maori, ara, a Te Kaea i te marama o Hereturikoka i tera tau, i te raweke putea te tahuhu rangapu raua ko te toihau o te Taura Whiri, engari, i hee tera whakatau.
Kotahi tau te Taura Whiri e tatari ana kia whakapaaha a Whakaata Maori ki a ratou mo tera hapa nui.
E kore rawa e whakaae.
Kei mua te umanga hinu o Tag Oil i te aroaro o te Kaunihera-a-rohe o Whakaahurangi, ara, Stratford, i tenei wiki, e kokiri ana i taa ratou tono kia kowirihia te papa, e rua rau mita i te whenua taapui o Taranaki.
Hei taa Daisy Noble o Nga Hapu o Ngaruahine, kei te whakahee ratou i te kowiritanga nei, a, kei te tino pouri hoki ratou, kaore te papa atawhai i korero ki a ratou mo tenei kaupapa.
He take tuupeka
He momo whakawai te tuupeka, te paipa, te hikareti me pehea e tapahi te whaawhaa haere o te Maori ki tera tarutaru.
I tenei raa kei te titiro nga roopu auahi kore ki te kaupapa rara i runga i te whakapae ka warea nga haapori Maori i nga ahua tuupeka waihoki ko te tumanako kia whaaiti te rahi o nga waahi hokohoko.
Koia tena ko te wawata hai whakatutuki i te whaainga kia auahi kore te motu a te tau 2025.
He pahi kauhoe.
Kua horoia e te tai moana o te Oneroa a Toohee i te Taitokerau.
Koia te korero mo tetahi pahi hari tuuruhi inanahi i hopukia e te tai.
Horekau he tangata i whara engari ko te pahi i tangohia ake.
Copyright © 2013, UMA Broadcasting Ltd