Listen Now: 
Ko Nga Turu Maori
Ka whitu tonu nga turu Maori ki ro whare paaremata, engari, me matua whakatu rohe pooti Pakeha ano.
Koira nga korero nui e pa ana ki te tatauranga o Aotearoa rua mano tekau ma toru.
E wha miriona, e rua rau, e wha tekau ma rua mano taangata kei Aotearoa e noho ana inaianei. Ma te Komihana Torangapu te rohe pooti hou e tohu.
He Pukapuka Hou
Kei te whakarewahia he pukapuka hou i te ra nei, hei tohu i te timatanga o nga kauhau Ngata a Ngati Porou.
Ko Paikea te ingoa o te pukapuka hou nei, na Oliver Sutherland e pa ana ki tana papa, a Ivan Sutherland, he hoa piripono no Apirana Ngata, he tangata tino maatau hoki, i mate wawe i te wa e rima tekau ma wha noa iho ana ona tau.
I te tau, kotahi mano, iwa rau, toru tekau ma wha, i tuhi pukapuka ai a Sutherland, ko The Maori Situation te ingoa, hei tautoko i nga kaupapa a Ngata.
Ko Nga Mahi Hiko
Kei te kokiri whakamua a Ngati Tahu i tona hiahia ki te whakapuare i te whare pungao ngawha o Nga Tamariki i te rohe o Taupo.
E mahi tahi ana te iwi nei ki a Mighty River Power me te Tauhara North No2 Trust, a, koia te whare pungao ngawha nui rawa o te ao.
Hei taa Ngahi Bidois o Ngati Tahu, i nga wa o mua, he tino taonga nga ngawha ki a Ngati Tahu, a, ma te whakapuaretanga o Nga Tamariki, ka whai hua nga uriwhai paanga rima mano o taua whenua ngawha.
Ko Nga Tangata Tokomaha i Tamaki Makaurau
Tera te heitara, e ono tekau oorau o nga mahi pakihi, e wha tekau oorau o nga taangata o tenei whenua, ka noho ki Tamaki hei te tau rua mano toru tekau.
He heitara tenei kua puta ake nei i te rangahau a te Kura Pakihi o te Whare Wananga o Tamaki Makaurau
Hotaka Whakamutu I Te Kai Tupeka
Kei te kimihia e te ratonga hauora o Tui Ora i Taranaki, etahi whakaihuwaka waahine hei awhina i nga waahine hapu ki te whakamutu i te momi tupeka.
Ko Emma Dillon, te kaiwhakahaere i te wahanga hou o Tui Ora e kiia nei, ko Mana Waahine Hapu services, a, hei taana, kei te tino maharahara ia ki te tokomaha o nga waahine Maori e momi tonu ana ahakoa kua hapu.
Hei tana, kei te kimi wahine hakinakina, tapuhi, takuta, kaiwhakawhanau, pakihi hoki kia tu hei whakihuwaka tautoko i nga waahine hapu.
Papuni Wai
E toka ana te tuu whakahee a te upoko o Ngati Kahunungu, ara, a Ngahiwi Tomoana i te papuni wai o Ruataniwha.
Hei taana kua puta etahi korero i te whare paaremata i tenei wiki, e tohu ana i te mahi tinihanga e mahia ana kia tutuki ai te kaupapa mo te papuni wai nei.
Hei taana ano, kaore e kore ka raru te awa i taua papuni.
Copyright © 2013, UMA Broadcasting Ltd
RELATED NEWS
