Listen Now: 
Turakina tera tonu pea ka katia.
Ahakoa nga iinoi a nga tauira o mua o te Kura o Turakina kia tuuwhera tonu te kura kua puta i a Minita Heekia Parata te whakatau o te waa ki te kati i nga kuaha o te kura.
Ka whakatuuturuhia taua whakatau a tera marama, mei i kore e puta mai he korero ano.
Hai taa Parata ahakoa te aroha e korerohia ana mo Turakina 49 noa iho nga aakonga kei reira me te nui o te utu ki te whakakaha i nga whare o te kura kia aaria i nga paanga ruu whenua.
Te Kaahui Ariki o Ingarangi ka haramai.
A tera marama ka haramai te tama a te Kuini o Ingarangi a Prince Charles raua ko tana wahine a Camilla ki te marae o Tuurangawaewae ki te tuutaki ki a Kiingi Tuuheitia.
Ko te taenga tuarua tera mo Charles ki te kaainga o te Kiingitanga he tuatahitanga mo Camilla.
Ka noho te tokorua raa i runga o Tuurangawae mo tetahi waa ahua roa rua ki te toru haora pea ka tuutaki hoki raaua ki etahi o nga taangata o te rohe.
Houpapa, he kirimana pai.
Ka whai hua nga pakihi o Aotearoa i raro i nga painga o te kirimana TPPA.
Koia te tirohanga a Traci Houpapa tiamana o te Kaahui o nga Roopu Maori e kiia nei ko FOMA.
Hai taa Houpapa i korero mai etahi maatanga take oohanga ki te hui a FOMA i tera wiki i te mutunga o nga korero kua maaia te ngaakau ki te wairua o te kirimana me te hiahia ki te kookiri i nga wawata o nga whenua katoa.
Hauora, he reo kee.
Whakarerekeehia te reo hauora e korerotia ana i tenei waa kia whakapai i te hauora o te Maori.
Hai taa Barbara Doherty o te kura neehi i Taamaki Makaurau he reo ano kei te korerohia e nga kaiwhakahaere hauora waihoki kaahore ratou e whakarongo ana ki o ratou tuuroro.
No konaa ka aro nga kaiwhakahaere ki te ahua o te maauiuitanga e kore ranei ki nga rongoaa.
He tohu whakahoonore.
Ka whakahoonoretia a kaumaatua Moorehu Rahipere ki te tohu taakuta mo aana mahi nui i te Whare Waananga o Waikato i roto i nga tau.
He kaikorero, he kaumaatua maarama mohio ki nga tikanga Maori.
I whai paanga te kaumaatua raa ki te hotaka rangahau e kiia nei ko Te Kotahitanga. Ka whiwhi i tana tohu whakatiketike a tera wiki.
Korowai ka waatea.
Ka waatea te roopu Korowai o Kaitaia ki te whakahou whare aa e kore e ngaro ko to ratou mana whakahaere.
I haukotingia ratou e te ture na te ahua o to ratou mana engari hai taa kaiwhakahaere a Ricky Houghton kua maarama ki te ture ka kore tetahi tangata kotahi e whai hua ka whakawhirinaki kee a Korowai ki te aroha o etahi atu ki te aawhina i a ratou, ki te whakatuu whare ki te aha ranei.
Copyright © 2015, UMA Broadcasting Ltd: www.waateanews.com
RELATED NEWS
