Listen Now: 
Taihoa ake e whakaiingoa a Whakaata Maori i to ratou rangatira hou
Hai taa Georgina Te Heuheu tiamana o te poari o Whakaata Maori na te nui o te tuuranga ka whakaroa i taa ratou whakatau kia pai ake te otinga.
Hai taa Te Heuheu he taimaha nga whakapae me nga amuamu e rere ana ki te wairua o nga kaitono.
Ahatia ka whakarite i tetahi tangata ki te hautuu i to tatou teihana mo tetahi waa poto a te wehenga atu o Jim Mather te toihau e hau atu ai ki te Whare Waananga o Aotearoa…ki reira aratakina taua kura.
Ko Cuniliffe kee e paingia ana e etahi mema Maori
E uu ana a Louisa Wall mema paaremata o Manurewa ki tana whakatau o mua araa, kia tautoko i a David Cuniliffe raaua ko Nanaia Mahuta.
He aawangawanga no etahi kiihai nga waahine Maori a Mahuta raaua ko Wall i tuu ki te taha i a Shane Jones ahakoa ko ia anake te Maori e whakataetae ana ki te tuu hai rangatira o Reipa.
Hai taa Wall ko Mahuta kee kei te tautokohia e ia me tana whakaaro ko Cuniliffe te tangata tika ki te hautuu i to ratou waka toorangapuu.
Ngati Kahu kei te whakahee i te whakatuunga o nga whare
E whakahee ana a Ngati Kahu o Muriwhenua i te hiahia o tetahi tangata whai rawa no taawaahi ki te whakatuutuu whare kei muri i nga taipuu o te takutai ki Karikari.
E kii ana te iwi ka whakatuma tera hootaka i nga urupaa tawhito o Ngati Kahu.
Hai taa Makere Mutu tiamana o te iwi, he waahi tino whakahirahira tera ki te motu na reira kua piikautia te kaupapa nei ki te Kooti Matua.
He kiriata kei te tautapatia
E whakapae ana ka tirohia te kiriata reo Maori o White Lies hai tautapa mo nga tohu nui e kiia nei ko nga Academy Awards i raro i te waahanga o nga kiriata no iwi kee
Ko Whirimako Black o Ngai Tuuhoe te tangata o roto, koia te kirata reo Maori tuatahi kia whakaarohia ki tera waahanga kiriata.
Ka whakaaturia ko White Lies ki te ahurei kiriata o Toronto apopo.
He whakaaro pai
Tino tautoko a Syria i te whakaaro o Ruuhia kia tukua a ratou tao paitini araa , chemical weapons ki te ao whaanui hai whakahaere.
I whakawehia a Syria tera tonu pea ka huri a Amerika ki te patu i a ratou no reira, kua tere whakaae ratou ki to Ruuhia whakaaro.
Kua tautokohia taua mahere e te Kaahui o te Ao, me nga puu nunui pera i a Wiiwii whenua me Ingarangi.
Hei taa Amerika ko wai ka mohio ki nga tino hiahia o Syria.
Copyright © 2013, UMA Broadcasting Ltd
RELATED NEWS
